Lt, Colonel Joan William-i hi India rama thawk tawh Missionary te zingah kan hriat lar ber a ni hial awm e. A pasal nen Missionary in Burma, India leh Sri Lanka-ah te an thawk tawh a. Sri Lanka-a an thawh laiin a pasal in Vankohna a chhansan a. Chumi hnuah India ram Kolkatta-ah Office neiin India pum Social Service Secretary in a awm a. Chuta tang chuan a retire ta a ni. India rama thawk tawh Missionary te zinga India ram hmangaiha, vei zung rengte zinga pakhat a ni a. Tunlaiah phei chuan ani lo hi chu thahnemngaia sum leh thahrui thawha an hmangaihna lanzui tirtu kan nei lo ni hialin a lang.Tavistock, Devon-ah a awm a, A In pawh a kawt lam chu Market an a ni a, a kawm thlang lamah Lui lian ve tak hi a tlawh chhan bawk a. A hnuaia thlalak hi a kawm thlang lam pang Lui luang langa kan lakho a ni. Kan nupa bakah Mamuani (Rev. Lawmsanga nupui) leh a fanu kan hruai bawk a. Kan vaiin a Inah Mizo in mikhual ang thlapin min lo mi khual a. Kan cham laiin ni khat chu India rama Children Home pakhat Simultala, Bihar a mi tana suam tuakna Coffee Morning a siam a. Kan theih ang angin kan puia, mi za lai an lo kalkhawm a, Pound 1500/- lai a hmu chhuak a ni. A target aia tam a hmu chhuak a, a lawm hle. Heng sumte hi a hmuna kalin amah ngeiin a hlan thin.
A hnuaia thlalak hi a kawt lam pang atanga a In thla a ni a, sawi tawh angin a kawt lam hi chu Market a ni a. In a nei tha a, Ama luah bakah a inte hi Mi pathum laiin an la luah a ni. A in chu Sapho in changkang taka thil an tih ang hian a ti ve lova, a Missionary In hle a, Chaw einaah pawh serviet in chhawp thlip thlepte a awm ve lo. Lehkhabu hlui khawnkhawmna a siam a, chung chu a hralh leh a, chung atanga a hmuh chhuah zawng zawng pawh chu Missionary-a a thawh tawhna ram lamah a pe vek zel a ni.
Pi Joan William-i chuan Sapram hmun mawi hmingthang Cornwall lamah min chhuahpui a, Tuifinriat kam khua Looe an tihah min va hruaia, Tuifinriat kam vela tlang ram tlang panga Zoram ang maia an insakhote chu mawi kan tiin kan lung an tileng hle a ni.
A hnuaia mi hi Haytor an ti a, Lung tlang a ni ber ang chu. A chhipa ka han lawn chhuk thla leh lam thla a ni. A chhip atang hian a chheh vel ram zau tak lang rai dup maite chu thla lak tumin video camera nen ka lawn chhova. Thli a lo thaw nasa em em mai a, a chhip lungpui zawlah chuan din chu sawi loh thut ngam pawh a lo ni lova, ka bawk phek tawp mai a. Chuta tanga ka chhuk chu thawh kan ngam ni tawh hek lo, zangthalin a tawlhin ka tawlh liama. Ka kekawr hnung ipte kawrkilh te pawh ka ti keh a, a pawngte pawh a tet hial a ni. Amaherawhchu zahpuiawm khawpa tet erawh a ni lo hlauh.
Mi tamtak chuan Missionarya an thawhna ramte dik lohna leh sualnate hi an hre reng thin a, chu chuan an hmangaihna leh an duhsakna te pawh a tihkiamsak thin. Pi Joan William-i erawh chu chutiang a ni ve lo. India rama thil dik lo leh sualnate chu a hre hlei hlei a ni a, mahse chung chuan a hmangaihna a tikiam chuang lova, a tizual zawk emaw tih tur a ni. Tunah pawh hian Zoram leh India ram hmun thenkhatte tlawh turin a in buatsaih mek a. A thiannu pakhat amah zui tum chuan Aizawl Baby homeah thla engemaw zat tal a theih chuan puih ka duh a ti nghe nghe. Pi Joan William-i India ram hmangaihtu hi dam reng rawh se.
6 comments:
Pi Williami an tih fo hi chu ka hre thin a, a hmel ka la hmu miah lo va. Hmanniah Aizawla a lo kal lahin ka hmu bawk si lo va, a hmel hmuh theiha i tarlan avangin a lawmawm khawp mai.
Coffee Morning te a la buatsaih thei hi a fakawm ka ti takzet a ni.
Lt. Col. Williams hi ka vawikhat hriatna a ni ve thung a, India ram a hmangaihna a lantir dan hian min hneh khawp mai.
A chanchin leh a kaihhnawih i thu rawn post hian keimahah zawhna tam tak min siam sak a ni.
Fela: Damtein a awm ang a, Aizawl a lo kal leh hun chuna i lo hmu ngei tawh dawnnia. Zohmangaiha tuna Modern School zirtirtu hi a sponsor a Londonah te a hruai thlaa mahse Zofam lama awm a duh zawk vangin a lo haw leh niin ka hria.
Zaia: Keini pawh min hneh takzet asin. A retire tirh atangin Bookworm Ally - a din a, Salvation Army lehkhabu hlui England pumpui atangin a khawnkhawma, amah ngeiin Motor khalhin a collect kual thin a. Chung a hralhna chu Rawngbawl nan a hmang vek a. Naupang tamtak a sponsor tawh a, a najupang sponsorte a chhinchhiahna bu min entir a an tlar bung tawh mai. Ngaihsan awm tak a ni.
@Kiamlova- Zohmaa (Zohmangaiha) hi tunah chuan Greenland Higer Secondery School, Chaltlangah Vice Principal a ni mek e. Kan fapa kalna school a ni. Harsatna kan tawh pawhin min lo ngaihsak thin hle.
Mrs William hi ka hmuh hmasak ber chuan Behala Girls home ah Incharge a ni a. Kolkata National Office kawt atang hian Boys School ah a motorin min va thlah a. Kan vawikhat kalna tur a nih avangin a hmun kan hre lova (Major Bula nen).A hmun thlengin a asst. min thlahtir thlap.
Kolkata a Officer ho hi kumtin Krismas duhsakna a hranpa ngatin a hlan ziah thin. A kal tawhna apiangah home naupang te tan engemaw tal tihsak nei lovin a awm ngai lo. Sri Lanka a kan awm hnu hian tum khat a fapa nen an lokal. An pa thlan a tlawh vawikhatna a ni.Kan awmlaia a lokal hi ka lawm khawp mai.Chumi tum pawh chuan helaia kan home te tan tanpuina a pe leh nual bawk. Boys home phei chuan phenglawng band an neih theih phah.
Hetianga hmangaihna ngah, insengso phal, midang tana sum tuak reng mai mi hi Lalpan malsawm sela dam reng rawhse.
Fela: Zohmaa hian Modern School a chhuahsan tihna em ni, nge a thawk kawp zawk.
Zamlova: I ti lawmawm e, i duhsakna thute leh thian dangte comment te hi amah ka lo hrilh ang.
Post a Comment