CHRISTMAS

Christmas a lo thlen apianga thil pawimawh em em mai pakhat chu 'Fapa pekin kan awm ta a, Van in khawvel sual hi a rem leh ta' tih hriatnawn leh hi a ni a. Chumi min hriatnawntir tur chuan khawvel hnamtin Kristianten kan rilru tithar thei tur apiang kan hmang thin. Kum tam tak kal ta atang khan kan chhungkuain Kristmas a kum tin kan tih ngei ngei chu Christmas Tree siam hi a ni.
Sapho thinlungah chuan Vur tla leh Christmas hi a in hmeh em em mai. Chuvangin Kumin christmas chu a Christmas bik riau dawn a ni. Hawina lam apiang a lo var uar mai a. Heng hian Bethlehem lamah rilru a hruai vang vang mai.

Keini nupa chuan In chhung chei (decoration lam) kan hlimpui a. Kan theih ang tawkin kan in chhung kan chei a, heng hian Pathian fapa Isua chu kan tan Bethlehemah a piang ngei a ni tih min hriat nawntir a min tihlim hle thin a ni.

Kan TV leh a velte chu kan Christmas cheimawina ten an hual tiau a, Football khel en pawh an tinuam leh zual. TV-ah chuan eng programme pawh en ila, kan tan Naupang a lo piang a ni tih a vela decoration te hian min hriattir.

Santa hi ngaisang ve lem lo mah ila, heng laiah chuan a serh zinga a mei ang hlauh a ni a. Christmas-ah chuan ngei ngei a, tihlan a ni.

Christmas lai chuan kan lehkhabu chhiar lai rem mawite pawhin lan an chang lo, Lal piang lawmna cheimawinain a hliah khuh vek mai a ni.

Heng lantern te hi German Christmas market atanga kan hawn an ni a, Isua hun laia an laltin hman chu hetiang hi a ni awm e. Kan hman ve than leh hriat than ni mah suh sela, han hman ve chuan a ti Mas riauin a hriat ve theih mai nia.Kan Dining table te pawh ni dang ang a ni lo, han en mai pawhin Lal thar a piang tih min hriattir a ni.

He hun lawmawm leh hlu takah hian kan in chhung room tin maite an danglam a, an thar suau mai a. Hawi na lam a piangin Lal thar a piang tih min lo hriattir a. Tlangsam par te hmu pha lovin, 'U amah i lo fak ang' tih in chhawn ri tluk tluk thawmte hre pha ve lo mah ila, kan hlim ve em em thin a ni. Eng dang vang a ni lo, Rem Lal piang chuan thinlai a hnem tlat vang a ni e.

CHRISTMAS

Chumi zan reh takah chuan,
Thlasik vur daifim hnuaiah;
Bethlehem bawng in tlawmah,
LalKrista a lo piang ta;
Van mipuiten an rawn thlah,
Kan sual min tlan tur;
Lei leh van lal ni mahse,
Chham ang zalna ranthleng a lo ni.

Christmas khawvel hun pui pawimawhber kan thleng leh ta. Pathian hmangaihna rawn intihniama khawvel sual hmangaih taka a fawhna hun chu. He hun tluka khawvel mihringte hlim kimna hun hi a awm lo vang. Chrsitian leh Christian lo pawhin kan nghakhlel tlang theuh niin a lang. Kan nghahlelh dan erawh a in ang lo thei e.

Aizawlah chuan Bazaar an khat lui lui a. Kan bazar na chhanber chu thawmhnaw mawi lei niin a lang.

Sap ram chu ei leh in leh party buaiin an buai a ni ber. Sum dawnna hmun zawsng zawng an cheimawi a. Dawrpui hmun leh khawlai cheina te chu an mawi thei khawp mai. Heng karah hian Bethlehema nau piang Isua lawmna thinlung pu hmuh tum ta ila zawn ngial a ngai awm e.

A hnuaia mi hi Israel rama Ran chaw pekna thleng, hman lai Isua hun lai vela an hman thin an hmuh chhuah a ni a. Isua an muttirna pawh kha hetiang hi a ni zawk mai awm e.

A pianna hmun tak nia an sawi, Bethlehema Biak In an sak hnan 'Ranthleng' an tih lai tak chu hei hi a ni.

German ramah chuan khawpui hrang hrangin Christmas Market an siam a. Rhine luiah Lawng lianpui mai pakhat chu Christmas marketah siam a ni bawk a. Heng market zawng zawngah hian mihringte inthuam mawina tur thawmhnaw lam reng reng zuk zuar ve hauh lova. Ei leh Ina intihhlimna tur lam chi pawh a awm lo. an thil zawrh reng reng chu Isua piang min hriatchhuahtir thei tur a hun laia an hman rua lam hlir a ni. A hnuaia mi hi an market pakhata an thil zawrhte chu an ni.

Christmas kan thlir dante hi a in ang lo hle hlawm mai. Chatuana ka damna tur Fapa min pek avanga Pathian hnena lawmthu sawina hun, chumi avanga lawmna thilpekte kan inpekna hun, Pathian hmangaihna kan puan chhuahna hunah i hmang teh ang u.

CHRISTMAS HI ENGTIKA LAWM TUR NGE

Christmas hi engtika lawm tur nge? December ni khata lawm hi a sualna a awm em? Kurunagala Corps Sri Lankah chuan December ni khatah kan hmang a. Ruai kan theh dur dur mai. Anglican Bishop te pawh an rawn tel ve a. Naupang an hlim Christmas thawmhnaw nen mawi tawkin an rawn in thuam. Kan hlim hle a ni.

Naupang chauh an hlim lo, Puitling ruai buatsaihtute pawh an hlim a, ruai pawh an hneh khawp mai. Corps in compound an lo nei tha bawk a, hei hi kil khata awmho te an ni.

An Christmas Carol zaipawlte hi an Corps mite bakah thenawm officerte an sawm bawk a. An hla sak zawng zawng hla pariat lai chu an Commanding Officer phuah vek a ni a. an zai thiam khawp mai. An DC te leh an divison CO hote sawmkhawmin an buatsaih a ni.

Zoramah chuan December ni 25 a ruai theh leh theh lohte kha kan in hnial deuh thinnate a ni a. Kan naupang lai chuan Zirtawpni hi Roman Catholic sa ei thian loh ni a nih avangin Christmas hi zirtawpniah a tlak chuan Inrinniah kan sawn mai thin. Sri Lankaah chuan December a kai tawh chuan duh ni niah a lawmna an siam mai niin a lang. In an chei tan vek tawh bawk a. A Christmas tawh hle mai. Hman chhung a rei a, a tih chi phian zawkin a lang. Mizo rilruin pawm thei tak maw!!!!

ONE SUNDAY SCHOOL TEACHER

In 1855, a Sunday School teacher named Kimbell, led a 19 year old shoe clerk to Jesus Christ. He in turn became a Sunday School teacher leading other youth to Christ.

Later he became a world renowned evangelist. His name - Dwight L. Moody. He led hundreds of thousands to Christ in USA and England. Though poorly educated, Moody in one of his English trips, influenced the well-educated and cultured theologian, Frederick B. Meyer to change his preaching style and emphasis.

Later F B Meyer came to USA on an evangelistic tour. On one occasion a discouraged preacher, Wilbur Chapman, was in the audience and through his preaching influenced him to become an evangelist. As his evangelistic ministry grew, he needed an assistant, so he hired a former baseball player with high school education to help him. His name - Billy Sunday.

Billy Sunday won over 1 million persons to Christ. In 1924 in charlotte, NC, a prayer group was formed, which met regularly. When the depression started, they became convinced it was God's judgement on the nation. They specifically prayed for another revival, and Mordecai Ham responded.

Mordecai Ham when he became an evangelist and he was preaching, a 16 year old farm lad was converted. His name - Billy Graham. Billy Graham has preached to millions of ordinary persons, as well as to kings, presidents and prime ministers. But it all started with a Sunday School teacher named KIMBELL. Suppose he, or any of the other, had failed to share the gospel.....

REMEMBRANCE DAY

Sapho hian tradition tha ang reng tak tak hi an nei a, 11 November hi Indonaa thite hriatrengna ni a ni a. Chumi ni hnaihber Pathianniah hun serh ropui tak an hmang thin a. Biak In service zawng zawngah pawh chhun dar 11-ah Indonaa thite hriatreng nan leh sun nan minute hnih ngawi rengin kan ding thin a ni. Vawiin hian chu ni chu hman a ni a. A hma deuh atangin hriatrengna atana an hman Poppy pangpar mi tamtakin leiin kawr hmaah an tar a. Hemi hralhna hian kumtin sipai thi chhungte tan pawisa tamtak an hmu chhuak thin a ni. TV leh Football khel te i en chuan hetiang bel hi i hmu ngei ang.A hunserhpui ber chu lalnu hovin hman a ni thin a, Church of England hotupain service a kaihruai a, tawngtaina leh malsawmnate a sawi thin. Vawiina an hun hman pawh a ropui khawp mai. A hnuaia hriatrengna lungphunah hian Lalnuin pangpar a dah hmasaber a, chumi hnu chuan mi ropui dangten a in dawtin an dah a. Pawl hrang hrangin kawng zawhin an dah zel a. Salvation Army pawh engemaw zat kalin a groupin kawng an zawh a, pangpar dah vein a puangtu pawhin 'Indonaah leh Emergency-ah volunteera thahnemngaitaka thawk thinte an ni, a ti.
A hnuaia mi hi Unknown Warrior (British sipai Indopui pakhatanaa thi tu tih hriat loh) thlan a ni a. Westminster Abbey a mi a ni. British sipai khawvel rama danga Indonaa thi tu tih hriat theih loh tam tak awmte aiawhin ruang pakhat an thlang chhuak a, chu chu Westminster Abbeyah hian mi ropuite zingah an phum ve a. Hetah hian mi ropui thlan tamtak a awm a, mahse zahna entir nana a chunga ke kal awih miah loh chu he Unknown Warrior thlan chauh hi a ni.

Bible chuan 'In hotu Pathian thu lo hrilh tawhtu che u chu hre reng ula an awm dana thil chhuak chu ngaihtuahin an rin dan zir rawh u' (Hebrai 13: 7) min ti a. Rinnaa mi huaisen kal ta te hriat rengna hian rinna kawngah min vawng nung a, min tihuai a, indona min hnehtir ve thin a ni. Hebrai bung 13 hian mi huaisen kal tawhte list sei tak min siamsak a. Hegn lo pawh hi keimahni hun theuhvah mi huaisen entawn tur tha min hnutchhiahtu kan nei theuh ngei ang.

BEISEINA NUNG

Ram Thianghlim 'Israel Ram Fan thu' by Lalkiamlova BA., B.D, thlirlawkna - by Dr Rualkhuma Colney - Principal, Aizawl Law College.
Mizo Thu leh Hla huangah, Lehkhabu thar duhawm tak mai, 'Beiseina Nung' tih Commissioner Lalkiamlova B A., B.D. ziak a lo piang tur hi a lawmawm ka ti a. Ram thianghlim leh Jerusalem chungchang hi a hmun ngei a kalte ziak kan nei nual tawh a, Mizo Kristiante rilru tam tak vawngtu leh kan lunglenna ram chanchin hi chhiar a nuamin a kal ve thei lote hnenah Jerusalem chanchin min han hrilh thin hi a manhlain a hlu thin a. He lehkhabu pawh hi Bible literature tha tak a ni a, Rinna leh beiseina kawngah min tiharh thei lehkhabu tangkai a ni. Hetiang lehkhabu an han buatsaih thei hi Commissioner te nupa chungah lawm thu ka sawiin, duhsakna ka hlan e.

Lehkhabu tin hian a ziaktu beisei leh tum ram min hruai thleng turin thil tihtheihna mak tak a pai theuh a, a ziaktu azir leh a thu ken azirin lehkhabu tha leh tha lo a awm thin. Engpawh nise, ziakin emaw tawngkain emaw pawh nise, an hmuh leh hriatte leh an beisei te fiah taka ziak thei leh sawi thiamte hi an an chhuanawm a, an thawh hlawk bik thin. Tin, kan sawi emaw, kan ziak emaw chu mi thinlunga fiah taka thun thei tur chuan a ziaktu emaw a sawitu emaw chu an thil sawi/ziakah an chian hle a ngai thung bawk.

He Lehkhabu ziaktu hi chutiang chuan, a sawi tum leh min zirtir a tumah hian a chiang a. A lehkhabu hi hun reilote chhunga ziak angin lang mahse, a nihna takah chuan a bul a tanna chu Jerusalema an zin dawn atangin emaw, an zin hawn hnuah emaw ni lovin, a pian thar hma a nih loh vek pawhin a pian thar veleh khan a ni ang tih ka ring. Chuvang tak chuan a lehkhabu hmanga min zirtir leh min hrilh a tum kawngah a chiang a, a ziak dan turah a mikhual lovin, zawh pawh a zo nalh narawh e. A sap tawng takin, a finishing a tha a, lehkhabu chhiarnahawm tak a ni.

A bu hmingah hian 'Beiseina Nung' ati a. A phuah chhan hi Bung Ngana lam daih, phek 39-naah a sawi a. Judate'n Messiah an beisei chu a lo kal hunah Jerusalem Golden Gate, Muslim lalin a kharsak tak tlat Messiah lo luhna tur ni ngeia an rin leh, a lo kal hunah chuan mihringte hawn ni lovin Van Pathian, Messiah thiltihtheihna avanga amaha inhawng tura an beiseina nung reng bakah, keini Pathian ringtute pawhin Pathian beiseina nung kan neih reng tul a tihna te tlawhchhana a bu hming hi phuah a ni a.

Bible a daw ngai dawn lo a. Bawhchhiatna tinreng leh thuawih lohna tinreng te hian thungrulhna fel tak an hmu zel thin. Pathian chatuan remruat chu mihring tihdangalam rual a ni lova; hun kal tawhah leh hun lo la awm zel turah pawh khawvel hian Bible dikzia leh rintlakzia tilang turin 'a aikaih' ang maiin hma lam a pan zel thin tih kan hriat theihna tura, ringtute lung tilengtu Jerusalem leh a chheh vela mit ngeia hmutu, Commissioner lehkhabu, 'Beiseina Nung' hi Mizote tan lehkhabu malsawm a nih ngei ka ring.

Pu V.L Hruaia CCG, Aizawl Temple Corps te, Pu C. Rokhuma te, Major Vanlalfela ten an lo chhiar lawk tawh thu leh, an hmuh dan an ziak pawh, a bu chhung thu i luh chilh hma a i han kalpah thuak thuak theih turin a phek hma lamah hian dah a ni a, kal pah ngei ang che.

He lekhabu hi thian dang tel lova an nupa chauhva Jerusalema an zin, ni 12 October 2008 atanga ni 18 October 2008 chhung, khaikhawmna a ni deuh ber a. Lehkhabu chhah lem lo, phek 122-a chhah, Bung 9 chauh awm, lehkhabu ngaihnawm tak, chhiar nuam leh chhiar zuamawm tawk leka chhah a ni. A kawm hma lamah hian Jerusalem khaw Map, Golden gate lang lai dah a ni a. A kawm hnung lamah a ziaktu mi mal chanchin tawi leh a lehkhabu ziah tawh te tarlan a ni a. Tin, hmun pawimawh leh benglut zual laia an thlalalk 25 lai dah a ni bawk. Bung khatnaah hian Mumbai Airport atanga Jerusalem an luh thu leh kal kawng chanchin kan chhair dawn a. Bung hnihna-ah hian Jerusalem an thlen tuk zinga Commissioner helhhawlh nasa lutukin an Taxi chuanna-a a Laptop a theihnghilh daih thu leh a chheh vel ngaihnawm takin min han khilai hlak a, chutah Bungthumna atangin hmun hrang hrang an fan (site seeing) chanchin kan chhiar tan dawn a ni.

Bung thumna hi Jerusalem an luh ni leh an cham nikhatna chanchin a ni a. Commissioner te nupa hian sawi set set lovin Jerusalem fang turin an han armeikawhchhuah ve ta tawp mai hian Pathian thu an hriatna leh Jerusalem lama lung leng thin an nihna avanga an rilru lama an tlangnel lawkzia min hrilh a. Picnic nikhuaa a chak fal bik leh helhhawlh chesual zui ta hi an ang viau awm e. mahse, an vanneih asiamin, khawtual na na na chuan mikhual hawiher an lo hre ngiang mai a, hlawh neia kaihruaitu ruai duh tur chi an ni ngei tih hai hauh lova bekbawrtu an tawng ta thuai a. Tichuan, hruaitu neiin an leng kual zui ta a. Nikhatna-ah hian Via Dolorosa lam atanga tanin, Church of the Sculpture te, Tahna bang te an han suatluan phawt a.

A ni hnihnaah chuan Bethlehem leh Berampute Beram venna phul te, Tuipui thi te, Jeriko te, Zakaia lawnna Theipui kung te, Isuan ni 40 leh zan 40 chaw a ngeina tlangte an han suartluan leh a. Tuipui thi, khawvel hmun hniamber chanchin a sawina-ah hian Commissioner hian khawvel hmun dang, tuifinriat aia hniam hmun 60 lai hming, an awmna leh an hniam zawng (meter) a dah tel a, hei hi thil tha leh tangkai tak a ni.

A nithumna chu, Jerusalem khawpui hlui-a veng hrang hrang, rilru lama an hriat lar ve tak tak, a taka an la hmuh si loh an han fangkual leh a. Muslim veng, Christian veng, Armenian veng leh Juda veng te. Chutah, Zion tlang lamah her liamin Lal David thlan te, Pindan chungnung te, Jerusalem Kulh kawngkhar te, Gate hrang hrang, Golden Gate (a bu hming lo pian chhuahna lai) te fangkualin, Gethsemani huan an pan leh a. Chutah Olive tlang-ah lawn-in, mihlui ho thlanmual te an han fangkual leh a. Bethphage, Isua chuanna Sanbengtung no awmna khua te, Lal Isua ngeiin 'Lalpa tawngtaina' kan tih a zirtir thinna hmun te, Simona in te uluk em emin an han fang leh a. A ni lina-ah chuan Isuate khua, Nazarethah kalin, Mari Tuikhur te, a hnena Lalpa Vantirhkoh a inlarna lai taka awm Biak In te, Kapernaum te, mipui 5000 hraina hmun te, Galilee Dil te tlawhin Jordan lui te mahni ke ngeiin an han dai leh vel a, hah pawh sawi phal lovin am takin hun an hmang leh a.

A ninganaah chuan hmun pawimawh tak tak dang, Sekem khuate, Bethani te tlawhin, lazara thlan leh amah hriatrengna Biak In te an tlawh a. He bungah hian, Isua thlan hmun te an tlawh chanchin bakah an hmun tlawh dante chanchin chhui zauna thui tak kan hmu a. A bik takin Gerizim leh Ebal tlang inkar hmun zau tak mai a, 'Aurinna leh i' pawh awm hlei lova tawng inhriattawn phak vek dan mak tak, Lapan mipui punkhawmna tana a hmun ruat bik mak dan chhuizauna te, Samari mite sakhaw rinna leh an awm phung te, Tuipui thi chanchin chipchiar tak bakah Abrahama Ramtiam luh thute leh a unaupa fapa Lota nena ram an insem thu leh a behbawm ngaihnawm tak tak i chhiar dsawn bawk.

A ni ruknaah hian, chhun dar 12:30-a chhuak tur an nih tawh avangin an fang tam lo a. An thlenna Hotel chung zawl atangin Jerusalem khaw thla Video in an la kual a. Isua Kross putna kawng zawhin a thihna leh an phumna hmun te an han sakhi ram fan thuak thuak thu kan hmu a.

Bung kuanaah hian a hma, kum 2005 May thla daih tawh a Atheni khuaa WCC khawmpuia Salvation Army ai awha a zin thuin a hnu a khar a. Atheni khuaa Hriatloh Pathian tan tih (Areopagi) lo chhuah dan (History) bakah Tirhkoh Paula te rawngbawlna chanchin ngaihnawm tak min khilai bakah WCC chungchangah ngaih dan fel tak kan neih theihna turin thuchah fel tak a zeptel bawk.

Commissioner hian Bible thu leh Judate History a hrehle tih he lehkhabu hian min hriattir a. Amah ngeiin mahni mit ngeia hmu bik si lova a lo ngaihven em em thin leh Training College-a Principal a nih lai atang renga a zirtir thin laia a zawhna tam tak a lo neih ruk ve thin te chungchang a, a chhanna te mahni mit ngeia hmuh ve a, a hmun ngeia han kal ve a lo chak ngawih ngawih thinna ram a han fang ta chu, a tui pawh a tuiin, a ngaih dan a ni hliah hliah tih a hriat reng a. A bu chhung thu inrem a thain, diary ang deuhva ziak a ni bawk a, a indawt tha thlarh mai a. tin, A sehhmeh turin thlalak te a dah bakah, Bible Bung leh chang hmangin a nemnghet tel zel bawk a. Uluk tak leh ngun taka chhiar chuan Jerusalem kan fang ve a ni ber mai. Commissioner hi ka hriat sual loh chuan pa titi thiam a ni a, ziak pawh a lo thiam narawh e.

Sawi tawh ang khan a Bible lamah leh a History lamah a chiang sa a, a hmuna fan hlan nghakhlel tak a ni bawk a. Damkawrrawp takin a chawhmeh duh zawng tak hmeh a, chaw a ei ang hi ni berin a lang. Sawi duah lo ila, Mizote zingah Israel ram chanchin tuipui leh ngaihven ber pawl a ka lo ngaih thin te zinga mi, Pu C Rokhuman 'Israel ram chanchin ka lo hriat ve leh ka lo ziah ve tawhte ka han chhut nawn leh hian, kei chuan vau chin leh chin lovah Sahdal leh Thangchep ve mai mai ka kam laiin, Commissioner Lalkiamlova hi chuan vau chhungah lutin Beai Thang a lo kam daih ni berin ka hria' a tih hian a tichiang tawkah ka ngai e.

Mizo Kristian, Jerusalem lama lungleng tak tak, kal ve thei si lo leh Pathian thua tui mite tan chuan chhiar ngei ngei chi a ni.

Commissioner te nupa Lalpan malsawm zel rawh se.

Ka lawm e.

NEWS COLLECTION

Bible chuan 'Pathianin tluang taka nung turin mihringte hi a siam a, anni erawh chuan an tikihirhkhan zo vek a ni' a ti a (Thuhriltu 7: 29). Heng chanchin bu lawr khawm mak dangdai tak takte hi ngun takin chhiar la, kan khawvel dinhmun hi eng nge ang i tih ve le?

He nu hi a bialpa nen an in kiss laia a lei (tongue) a lo seh thlaksak avangin roreltuten lung in tang turin a chung thu an rel thlu a ni.

He nausen pianghlim hian a nun hmangaih taka a kiss chu a thih phah ve tlat mai. Kan khawvel hian hri tha lo a vei a ni. Fimkhur ava ngai em!!
Khawvel lum zual zel (Global Warming) chuan san lam a pan zel a, Chatuan vur awmkhawm tlang lian pui pui leh khawmual zau pumpui anga champut maite chu an tui huau huau reng a. Chu chuan tuifinriat tui tipungin a chim chin a sang chho zel a.

Tuifinriat chim chin sang zel chuan thliar kar tam tak chu hlauh thawnawm takin a awm tir a. Kan India ram bul mai a thliar kar pakhat Maldive ram tam zawk chu tuifinriat atanga feet sarih lek a sang a ni ta. Khawvelin a hlauhawmzia an hriat nan tiin Maldive ram lal chuan a Cabinet Minister zawng zawng chu tui liluh thiam vek tur leh, tuifinriat hnuaia Cabinet Meeting nei tura in buatsaih turin a ti. A lema a lan ang hian Diving suit nen an in ring thap mai.
He naupang hian a pa ler a thih phah ve thung. A pa in a nau nen awmin, Nau nawrna in Tuifinriat ko sang tak chunga kawngpui kamah an kal a. Chutih lai chuan A pa chuan a bialnu a hmu ta hlauh mai a. An han in pawm kiss chuan a fate pahnih Nau nawrnaa a nawr mekte chu a theihnghilhin a thlah ta mai a. Tuifinriatah an tlat liam ta, chhan tumin an pahnihin an zuang thlaa, mi dangin an rawn pui ve bawk a. Mahse a unaupa chauh an chhan chhuak a, ani te hi chu a dam chhuak zo ve ta lo a ni; ava khawngaihthlak em!! I ler vang em ni, i ler vang em ni? tih hla kha a ang khawp mai.

Pathianin mihring fate hnena a pek Lei (Planet Earth) mihring finna leh thiamna te, duhamna te hmanga kan tih chhiat vek tawh hnuah pawh la duh tawk lovin, Thla (Moon) pawh duhamna avangin kan bomb ul ul mai dawn a nih chuan le!!! Zawlnei Joelan 'Ni thimah a chang ang a, thla thisenah a chang ang a, Lalpa ni ropui tak leh rapthlak tak chu a lo thlen hmain' (Joela 2:31) kha a thleng dawn a ni mai lawng maw.

Biak Ina inkhawm zai te hial pawh zai ring lutuk lo turin kan in khap ta a nih hi le!! kan khawvel hi chu ava danglamin Pathian thu hian lalna ava chang ta lo nasa em aw!!! Amah fak nana aw min pekte pawh hmang tha ngam lo tura inkhap a ni ta hial mai.

Chutih laiin Chelsea boss chuan a teamten an khelh chhung zawng Pathian malsawmna dilin Kross a lo hum ran thin.

KA CHHINGMIT KHARLAI MIN HAWNSAK VE ANG

Kum 1975 kum khan Mizoram Sorkar leh Salvation Army in be remin Kolasibah Mitdel School hawng tura hmalak a ni a. June thlaah kan hotuten Kalimpong Mitdel Schoolah Mitdel hawrawp zir turin min tir a. Dhalchera Corps-ah Commanding Officer kan nih lai a ni a. Kan fa upaber Janet Lalmawipuii chu thlaruk mi chauh a ni a, Kalimpong-ah chuan keimah chauhvin ka liam thla a. Mitdel zirlai leh zirtirtuten an hawrawp leh anmahni enkawl dan, kaih dan thlengin min zirtir a. Kum a lo ral a, December a lo nih meuh chuan, kut kherin chhiar ve thei lo mah ila, ka thiam thaw khat ve ta viau mai. Janaury thla lamah chuan Mitdel School thar hawng mai tura in ngai kha a In sak a la inpeih loh avangin Mary Scot Home ah chuan Assistant in Brigadier Dorothy Page-i hnuaiah appoint kan ni ta a. Ka nupui leh kan fanu Janet Lalmawipuii kum khat lo ni ve chiah chu ka han hruai a. 1976 kum chu School-ah zirtir pahin Mizoram Primary School zirlaibu Mitdel hawrawpa lehlin nan kan hmang ta a ni.
Kum 1977 January-ah Zoramah chuang chhuakin Kolasib-ah School chu kan han hawng tan ta a. Official-a hawnna erawh chu 17 April 1977-ah Territorial Commander Colonel Jaikumar Makanji an a nei. Hemi ni hian khua a chhe hle chungin Sorkar hna thawk mi lian engemaw zatin Aizawl atangin min tawimawm.

Mizote hian kan fate rual ban lo apiang hi kan lainat a zual a. Mitdelte zirna schoola tirh pawh kan harsat khawp mai. Anmahni tana rilru nawm vena tur lam kan ngaihtuahpui thiam loh vang a ni bawk a. An hmangaihna leh lainatna ngawt thlirin nu tam takten 'a ni mit khaw hmu lo thawh chhuah ka it lo' tiin lehkha zir tura tirh an remti lova. Chungte hrilh fiah nan leh Mizo mipui hrim hrimin Mitdelten lehkha an zir thei a, hna an thawkin mahni an into delh thei a; Nu leh pa leh chhungte chawmtu an ni thei tih an hriat nan Campaign neiin kan chhuahpui reng bawk a. Kum 1977 kum chuan campaign-in kan zin chhuak nasa hle a ni.
Tum khat chu Bilkhawthlirah Pathianni hmangin kan kal a. Kan haw lam chu zing karah Pu Lalhmingthanga Ralte Junior Engineer PWD in a Mortorin min han thlah a. Bilkhawthlir kan pelh phat atangin kan zai tan a, engemaw chen kan tlan hnu chuan hla pakhat a phuahtu ka hre lo:
'Lei hring nun hi ka pelh hun chuan,
Lungngaih tahna a bo vang;
Tlansate nen hlim tawp lovin,
Chhandamtu kan fak ning lawng'
tih hi thiam em em mai hian kan naute chuan an sa a. An sak lai chuan ka hnuk a ulh ta tlat mai a. Lei hring nun pela Lungngaih tahna bo hun tur an tana a nghahhlelhawm bikziate ka ngaih tuah a; zaipui thei lo khawpin ka tap ta mai a nih chu!! Chu chuan hla thar min rawn pe a. In kan thlen veleh Pen ka la a. Ka ziak nghal ta a.

He lei hring nun buaina ramah,
Ka chan tawk khuarel ka han dawn thin a;
Thimna leh thawpikna chauh maw,
Ka chan tawk reng hi lo ni le, Lalpa.
Hring mi naufa zaleng zawngten,
I kut chhuak ropui hmuin an chhiar;
Mahse ka nunnaah kei zawng,
Thimna lalin ro a rel e, Lalpa.

Ka chun leh zua unau zawngten,
Tinkim dawna nun khua an rel changin;
An lungawi lo an hrai duh leng,
Khawvel par mawi tawng lova ka leng hi.
Mahse min hmangaihtu Kristan,
Pathian ropuina tur a lo ti;
Amah fakin ka zai ang a,
Ka nih dan zawng i tan ka hlan Lalpa.

Ka thimna ram he thlaler hi ,
Ka pelh hun chuan hmangaih Lalpa ramah;
Nunna tharin lungduhte nen,
Hmangaihtu hmel kan la hmu ve ngei ang.
Tah chuan min hmangaihtu Kristan,
Nunna thar min lo pe dawn si a;
A kut chhuak ropui chhiar turin,
Ka chhingmit khar lai min hawnsak ve ang.

Ka nupui Lieutenant Lalhlimpuiin a thluk min siampui a, rei loteah sak theihin kan peih ta mai a. Ka phuah han tih chi pawh ni vakin ka hre lo. Lalpan min rawn pek liau liau ni berin ka hria. Chu hla thar nen chuan Zoram dung leh vang kan fang a, kalna apiangah mi rilru a hneh viau zel a. Kan nauten an hawrawp an chhiar a, Mitdel Sana pakhat kan neih chu mipui hmaah kan entir zel bawk a. Zoram mipui pawhin Mitdelte tan lehkha zir theih a nih leh kut dawha kawng sira thu mai lova mahni kut hna thawh chhuah ngeia din theih a nihzia kan hre chiang ta in ka hria.

Kum 1977 a lo tawp a, 3 Decembera Advance Christmas kan hmanni te kha a ngaihawm ta hle mai. Kolasib khaw chhunga sipai leh thian tha engemaw zatin min rawn hmanpui a, kan hlim teh asin!! Tunah chuan khang hun laia kan naupangte engemaw zat Matriculation pass leh graduate hialte niin sawm chuang laiin sawrkar hna an thawk ta mai hi lawmawm ka va ti tak em!! Hman kum deuh tawh atanga Aizawl khawpui kawtthlera Mitdel zaia kutdawhte ka hmuh hian ka rilru a na hle thin. Engemaw zat hi kan School naupang thin in zir chhuak zo ta lote an ni a. Hengmite tan hian eizawnna tur kawng dang zir tur a awm ngei ka ring thin. Hetia kutdawha mi thatnaa innghata awm ringawt lova an awm dan tur hi ngaihtuahpui tha ka ti khawp mai. Hetia kut dawha an zai hian mi rethei leh harsa dangte tan hna thawk hram lova kutdawha thut hi ei hmuhna awlsama ngaihna a hrin theih avangin sorkar pawh hian ngaihtuah deuh se tha ka ti hle. Kolasib Mitdel School Lalpan malsawmin hruai zel rawh se.

Lt, Colonel JOAN WILLIAM - MISSIONARY

Lt, Colonel Joan William-i hi India rama thawk tawh Missionary te zingah kan hriat lar ber a ni hial awm e. A pasal nen Missionary in Burma, India leh Sri Lanka-ah te an thawk tawh a. Sri Lanka-a an thawh laiin a pasal in Vankohna a chhansan a. Chumi hnuah India ram Kolkatta-ah Office neiin India pum Social Service Secretary in a awm a. Chuta tang chuan a retire ta a ni. India rama thawk tawh Missionary te zinga India ram hmangaiha, vei zung rengte zinga pakhat a ni a. Tunlaiah phei chuan ani lo hi chu thahnemngaia sum leh thahrui thawha an hmangaihna lanzui tirtu kan nei lo ni hialin a lang.
Tavistock, Devon-ah a awm a, A In pawh a kawt lam chu Market an a ni a, a kawm thlang lamah Lui lian ve tak hi a tlawh chhan bawk a. A hnuaia thlalak hi a kawm thlang lam pang Lui luang langa kan lakho a ni. Kan nupa bakah Mamuani (Rev. Lawmsanga nupui) leh a fanu kan hruai bawk a. Kan vaiin a Inah Mizo in mikhual ang thlapin min lo mi khual a. Kan cham laiin ni khat chu India rama Children Home pakhat Simultala, Bihar a mi tana suam tuakna Coffee Morning a siam a. Kan theih ang angin kan puia, mi za lai an lo kalkhawm a, Pound 1500/- lai a hmu chhuak a ni. A target aia tam a hmu chhuak a, a lawm hle. Heng sumte hi a hmuna kalin amah ngeiin a hlan thin.
A hnuaia thlalak hi a kawt lam pang atanga a In thla a ni a, sawi tawh angin a kawt lam hi chu Market a ni a. In a nei tha a, Ama luah bakah a inte hi Mi pathum laiin an la luah a ni. A in chu Sapho in changkang taka thil an tih ang hian a ti ve lova, a Missionary In hle a, Chaw einaah pawh serviet in chhawp thlip thlepte a awm ve lo. Lehkhabu hlui khawnkhawmna a siam a, chung chu a hralh leh a, chung atanga a hmuh chhuah zawng zawng pawh chu Missionary-a a thawh tawhna ram lamah a pe vek zel a ni.

Pi Joan William-i chuan Sapram hmun mawi hmingthang Cornwall lamah min chhuahpui a, Tuifinriat kam khua Looe an tihah min va hruaia, Tuifinriat kam vela tlang ram tlang panga Zoram ang maia an insakhote chu mawi kan tiin kan lung an tileng hle a ni.

A hnuaia mi hi Haytor an ti a, Lung tlang a ni ber ang chu. A chhipa ka han lawn chhuk thla leh lam thla a ni. A chhip atang hian a chheh vel ram zau tak lang rai dup maite chu thla lak tumin video camera nen ka lawn chhova. Thli a lo thaw nasa em em mai a, a chhip lungpui zawlah chuan din chu sawi loh thut ngam pawh a lo ni lova, ka bawk phek tawp mai a. Chuta tanga ka chhuk chu thawh kan ngam ni tawh hek lo, zangthalin a tawlhin ka tawlh liama. Ka kekawr hnung ipte kawrkilh te pawh ka ti keh a, a pawngte pawh a tet hial a ni. Amaherawhchu zahpuiawm khawpa tet erawh a ni lo hlauh.

Mi tamtak chuan Missionarya an thawhna ramte dik lohna leh sualnate hi an hre reng thin a, chu chuan an hmangaihna leh an duhsakna te pawh a tihkiamsak thin. Pi Joan William-i erawh chu chutiang a ni ve lo. India rama thil dik lo leh sualnate chu a hre hlei hlei a ni a, mahse chung chuan a hmangaihna a tikiam chuang lova, a tizual zawk emaw tih tur a ni. Tunah pawh hian Zoram leh India ram hmun thenkhatte tlawh turin a in buatsaih mek a. A thiannu pakhat amah zui tum chuan Aizawl Baby homeah thla engemaw zat tal a theih chuan puih ka duh a ti nghe nghe.

Pi Joan William-i India ram hmangaihtu hi dam reng rawh se.

LEGENDS OF GLASTONBURY

Great Britain-ah kum ruk lai kan lo awm ve ta bawk a. Kumin chu an ram mawia an sawi Devon leh Cornwall i tlawh ve teh ang kan ti a. Kan tlawh chak zualna chhan pa khat chu kan tunu hmingah Devon tih a nih vang a ni. Vanneih thlak takin Devonah hian Lt, Colonel Joan William India rama Missionary a awm tawh thin, India hmangaih em em mai chu a awm hlauh bawk a. A Inah Mizo in mikhual ang thlapin min lo mikhuala, a chungah kan lawm teh asin. (Chanchin kimchang Army Home lamah ka dah e). Kan thlenna khuaa chu Tavistock a ni a.

Tavistock-a an Biak In pakhat compoundah chuan Thing phun pakhat an lo nei a, chu chu kan thla lakpui hi a ni. He thing hi 'Glastonbury thorn' an tih zar sahthlak a ni tiin kan Guide chuan min hrilh.

Glastonbury Thorn: Sapho thu in hlan chhawn in a sawi dan chuan Isua thih hnu khan a ruang la thlaa phumtu Josepha Arimathai khua a mi kha Glatonbury-ah hian a lo kal a. Kohhran a rawn din a, chu chu Saprama Christian Kohhran ding hmasaber a ni nghe nghe. A Kohhran din Biak In compound-ah chuan a tiang a sawhphun a, chu chu a lo chawr a. Christmas ni apiangin a par a. A par chu vawiin thleng hian England lal In (Buckingham Palace-ah) an la thawn ziah a ni. Chu thing danglam leh chanchin nei tak mai chu a hnuaia mi hi a ni.
Hemi hmunah hian Christian-ten kut ropui tak an hmang thin. An sawi dan chuan Josepha Arimathai kha mi hausa tak a ni a, Isua nen inlaichinna an nei a. Glastonbury-a a kal hian Isua Nu Mari pawh a hruai a ni an ti.

ENGIN NGE HLA MIN PHUAH TIR

Salvation Army Officer training session 'Light Bringer' chu October 1970-ah tan a ni a. Kei chu a tir atanga pawm ka ni ve lova. Kal thei lo pakhat, Baktawng a mi ni ta awmin ka hria, a awm azarah kan hotuten min rawn ko ve leh hnuhnawh a. December thlaah Christmas dawn tep hian ka lut ve ta a. Cadet Kiamlova, ka ni ve ta.
1970 Octoberah min Commissioned a. Ka Corps hmasaber chu Tlangmawi a ni a, khaw lian lo tak a ni a. A khua pawhin In 14 chauh kan ni a. Primary School leh Middle School a awm a. A khua chu tlang chung zawla awm nuam em em mai hi a ni a. Amaherawhchu kan luahlum zawh loh em avangin khawchhung hnimbuk karahte hian Phivawkte an rawn riak ve thin a. Sai a rawn luh thuak thuak changte a awm bawk a. A khuain Sipai pawl vek kan ni a, chutih laia an lal chuan kohhran dang din a phal lova, Sipai pawl khua a ni tawp mai a ni. Kan mite chu ei leh barah an harsa em em mai a, mahse kan awm chhungin Pathian ram an neih ang atangin an pe tha a, Cachar District chhunga thawhlawm nei thaber kan nih changte a awm ve a. Chutih lai chuan thla khatah Rs 60 ka hlawh a, tanpui ngai zualte theih ang angin ka la pui ve leh chhawng thin a. Pathian zarah ka nghei bik lo.
Khawhar em em mai chang hi ka nei thin a, Kan khua atanga hmar thlang lam pangah chuan Ngaihban tlang ngaw dur tha em em mai hi a awma. Tlai ni tla turin chung tlang vel an chhun en ruih maite chuan ka lung a tileng zual thin a. Ka tap ru deuh thin a niber e. Kan bul hnaiah Officer dang han biak phak tur an awm mai si lova. Lothazawlah Lieutenant Thanhlira a awm ve a, mahse reiloteah Zoram lamah an sawn chho va. A Corps pawh chu ka va bial tel ve ta nghe nghe a. Pathian tanpuinaa ka tuar chhuak thei kha ka va lawm em!! Ka lungleng khawhar chu a ni taber ang chu hla min phuahtirtu kha; He ti hian ka'n ti ve ta a nih kha:

1. Aw awmkhua a har tinkim ka dawnin,
Nun hlui puan ang a chul tawh hnu kha;
Ngai mah ila kir an rel lo,

Zaitin ka chhiar nilen e.

Aw min awmpui la ka Lal nunnem,
Hmuh ka nuam i ram mawi chullo lawmna parmawi,
Vulna hmun min thlirtir rawh.

2. Thal favang tlai ni tla eng riaian,
Mahten awmhar tuar ka zuam lo e,
Leng la Lalpa ka thinlung ah,
Awmhar tuar a nem tawh ang.

3. Tlang tin ka chuan vel nun hlui ka thlir a,
Siangah an lawi siamtu runah chuan;
Mahriakten ar ang ka vai e,
Tinkim ka dawn chang ni hian.

4. Ka ngai ka pa ram lungduh an lenna,
Tahchuan awmhar tuar a awm tawh lawng;
Min tlantu beramno fakin,
Lungduh zawng an kim tawh ang.

Vanneihthlak takin Traininga kan awm laiin Naupang khawmpui Ruallungah kan tel ve a. Chuta tang chuan ka kumtluang kawppui tur ka chhar ta. Kan dawta Officer training session an hawn chu engemaw chen an kal leh tawh a; Kan hotute khawngaihna azarah engemaw chen session a kal hnuah, keimah ang bawkin, kan hotuten Nl Lalhlimpuii chu Cadet nih an phal ve leh ta a. Hun laklawhah training chu a zawm ve leh ta a. 1973 April thlaah chuan hotuten ka khawhar min hriatthiampui a ni ang, amahin an commissioned a, min rawn zawm ve ta a. Khawhar a hnem teh asin!!!!.

WALES LAM VE THUNG

Wales han tih hian zofate lung a kuai a, Pathian hnenah lawmthu min sawitir thin a ni. Mizo Pastor pathum lai Wales-a kan nei ta mai hi a lawmawm hle mai. Kawng khatah chuan min hringtu zawkte tlakhniam takzia a tilang thei a. Lehlamah chuan an fa hrinte an tihpuitlinzia a tilang bawk. An fa hrinte heti khawpa an puitlin tawh chuan a hringtu chuan tar lam an pan chu dem vak tur em ni ang. An faten an enkawl ve thung pawh chu an tihtur dik tak a ni dawn lawm ni. Sum leh paiah thleng pawh an harsa a nih chuan nu leh pate chu kan pui let ngei tur a ni ang chu. Zoram kohhran pakhat tan Wales-a Pastor pakhat chawm hi thil harsa a ni reng reng lo. Kan pastorte hian Wales ram chungchangah sawi tur tam tak an neiin sawi pawh an sawi ngei ka ring a. Kan Missionaryte hnena lawmthu sawi nan ka blog-ah hian kan dah ve hrim hrim duh a ni.
Kan Missionary-te hi an fakawm ka ti thlawt. An rawn kalsan ram nawmzia leh mawizia lam hre hawt lovin, kan zoram chu nuam leh mawi ti em emin, Thingpui parcel ruak ngei mai kha Double base-ah siamin 'Kan zoram nuam hi chhawr pial run i iang e; Hei aia ram nuam zawk hi ram dang awm ve maw!! tihte kha kan sak khum tlut tlut mai a. 'Kan ram a nuam zawk daih' tiin min lo nuihsan reng reng lova. Naupang tawng thei tir nu leh paten an lawm ang tluk zetin thiamtakin min lo lawmin min lo dawm mai mai a ni tih an ram han hmuh hian a chiang khawp mai.

Tuifinriat chunga tlai thlifim dawnna tur Leihkapui an dawhte hi a pui hem hem asin.

Tlang sang tak tak leh kham rang mawi tak takte pawh an nei ve tho mai.

Snowdon tlangte hi Englanah pawh an tlangsang ber a ni a, mahse Rel an lawntir thei tlat nia.

Kan Ruahthimpuite pawh kha an tan thilmak tak a ni lovang. An ruah haw turte reng hi an thim ve mai.

An thingtlang khuate hi asin mawi, 'Aw enchim loh thlir ninawm loh' tia thlir vawng vawng mai tlak thiau an ni.

Missionary Pi Tei-i phumna thlan mual, tlan paha Motor atanga kan lak.
Quary Slate an laih chhuahna, tunah erawh chuan an hmang tawh lo.

MIPA KAWR LEH HMEICHHE KAWR

Tunlai hian Mipa thuam leh Hmeichhe thuamte hi a danglam ta lo hle mai a. Mipa hmeichhe thuama inthuam chu an awm kher lo mai thei a, Tuaite an nih loh chuan. Hmeichhia erawh chuan mipa thuam an inbel nasa ta hle mai. Kan thawmhnaw atang chuan mipa leh hmeichhia pawh hriat hran a harsa ta.
Mipa kawr leh Hmeichhe kawr danglamna ber pakhat chu a kawrkilh awmna hi a ni a. Mipa kawr chu a lema a lan ang hian a kawr hma dinglamah kawrkilh a in vuah a. Hmeichhe kawr erawh chu Vei lamah kawrkilh a in vuah. Hei hi a chhan i hria em? Hmanlai in indo reng renga khawsa an ni a. Mipa chu raldo tura ngaih a ni mai a. Chung laia an ralthuam tha chu Ngunhnam a ni a. Chu chu Mipa in veilam khelah an pai thin a. Chu chu an dinglamin an phawi thin a ni. Kawr atan kawrkilh an vuah tan dawn hian nasatakin an ngaihtuah a. Mipa hi dinglamah ni sela, chutilo chuan Ngunhnam phawiin a lo bat thei dawn a, tiin Mipa kawr chu a hma dinglamah kawrkilh an vuah ta zel a ni.

RAM NGAW HUMHALH

He thlalak mawi tak mai hi Saituala Salvation army Hlimna In chung atanga khawthlang lam hawia ka lak a ni a. Zoram thla ka lak hrang hrangte zingah mawi ka tih ber a ni. Tlangdung pahnihna hi Seling tlang dung a ni a, a dawt lehah sawn Durtlang leh Aizawl te pawh a lang thei. Hetiang ram hring mawi tak mai hian mit a tihahdam a, min tihlim a, nun a tinuam a, boruak a vawng tha bawk a. Mihring hriselna atan pawh a tha a, ram sate tan a nuamin an nunna a ni bawk a. Vawn that reng atan ava tha em!! A hnuaia mi hi zuangtui Kudam, Sangthankima hovin mi harsate an enkawlna Riangvaite Run lam phei kha a ni a. Salvation army tawngtai tlang pawh chiang takin a lan khi.

Kan lo neih dan hian ram chu a tichhia a ni. Kangvar laiin zoramah kan zin a, a hnuaia mite pahnih hi Karvar thla kan lak a ni. Hman laia kan tih ve fo thin dan mah ni se kan hmuh lohna a rei tawh a, ram ngaw humhalh tulzia hriatna ram leh ngaihtuahna atanga han thlir chuan ram kan tipamhmai chauh pawh a ni lova; a lungchhiat thlak thei hial a ni. Zoram mipuiin thlawhhma atana kan neih tur aia zau zawk ram kan tikangchhe tel zel mai si a. Tumah lah dem tur an awm chuang lova, kum hei chen State sorkar kan nih hnu pawhin a thlakna tur tha kan la hmu chhuak si lova. A thlakna kan hmu chhuak lo a nih pawhin hman lai ram theh leh humhalh ang khan ram kang zau lo thei tur ang bera ram theh te la ni sela a that dawn teh reng nen. A tihdan tha zawk hmuh chhuah chu a ngai a ni.

Kan sorkar hotute tih tur chauhvah dah lo ila; kan Scientist hote, kan Agriculturist hote leh lo neitute tangrual in, thingtlang lo neih dan tha zawk hmuh chhuah tumin beihpui thlak a ngai a ni. Ram hmangaihtute hian ram tak tak hi i hmangaih teh ang u. Tih dan tha nia kan hriat apiang thawh tlang ila, i tangtlang teh ang u, kan zaa mawhphurhna a ni e.