KA NAUPAN tet deuh lai chuan ka pi leh pu (ka nu Nu leh Pate) zuiin Roman Catholic-ah ka inkhawm ve thin a. Kum sawm ka nih hma in (ka kum chiah ka hre ta lo) Sipai pawlah ka let leh a. Zan khat chu Naupang Inkhawm Nilai thawhtan zanah (Other Y P Meeting) ka inkhawm a. Captain Saidawla kan Commanding Officer-in Inkhawm min hova, kan hlim khawp mai a. Naupang Sipaia lut turin min zirtir a, sawi rual thei turin thutiam te min vawn-tir a. (Chuta tang chuan vawiin ni thleng hian Naupang Sipai thu tiam chu ka theihnghilh leh ta reng reng lo. Palh hauh lovin ka la chham thei a ni) Major chuan Isua Lal leh chhandamtua pawm duh te chu Zahngaihna Dawhkanah kuna, Pathian hnenah kan thutiamte chu thlen turin min sawm a, ka va kun ve a. Isua chu Lal leh Chhandamtuah ka pawm ve ta.
Nikhua a lo rei a, kan lo tleirawl chho va. Tum khat chu Christmas lai hian thian zahovin Christmas sa tlemte lain kan lo kang a. Chu chu an lo ngai sual ta phian mai si a. Kan mualpho ang reng hle a. Ka nu ka hlau em em mai a. A lenkhawm hlanin keimahin Inah ka awm a, a lo haw tih ka hriatin pawnah ka chhuaka. Kawtah kan in tawk ta si a. Min hau hrep dawn emaw ka ti a, mahse 'Mama Zahngaihna Dawhkanah kun la ngaihdam dil ang che aw!' min ti a. Kum hlui thlah zan, Zan lai Inkhawm-ah chuan ka kun ta ngei a. Ngaihdam ni hliah hliah hian ka inhria a. Ka thianteho hnenah pawh 'kei chu Lalpan min ngaidam tawh' ka ti hial a, min nuih mai mai a.
Hun a lo kal zel a, Mizoram a lo buaia Ramhnuaiah te kan han ti ve zar zar a. Kum 1967 kum tawp lamah khan Campaign Inkhawmah Pathian aw ka hria a. Mizoram mai ni lo, Ama Lalram zawk chhan turin min kova. Zan a rei tawh hle a. Zanlai vel a ni a, Chumi zan la la chuan keimahin kan Biak In, kan khua Chhawrtuia tlangsangber laia awm-ah chuan ka kal ta a. Zahngaihna Dawhkan ngai bawkah khan ka han in hlan leh a. Chuta tang chuan a ni Lapan 'Heta tanga hla takah ka tir ang che' tia Cachar ram lama min tirh tak daih ni.
Zahngaihna Dawhkan hi ka tan chuan ava hlu em ve aw. Chu ka zahngaihna Dawhkan Kunna-ah chuan 'Sim rawh u Vanram chu a hnai twh e' tih hi a in ziak a. Kan Biak In chu Vaiin min halsak a. Kan khua an khawm a, rei tak a ram a. Chumi hnuah lut lehin Biak In chu hmun dangah an sa ta a. Mahse kan Biak In hmun hluiah khan Cement in Zahngaihna Dawhkan 'Sim Rawh u Vanram chu a hnai tawh e' tih in ziak khawtlangin min siamsak a. Chu chu ka kal changin Inhlan thar nan ka hmang thin. Zahngaihna Dawhkan ka tan iva hlu em!!
6 comments:
A va ngaihnawmin thinling a va hneh em!
"A thu phelh tawh ngailova khan a siam che Ama chen nan."
A kotu che hi vawiin ni thlengin a la rinawmin a la rintlak reng tih a va chiang em!
Thuziak tura behchhan tur i ngah bik ngawtin ka hria, entirnan Tatkawng te pawh.
Vanneihtluanga short novel, 'Lamkhuang' tih chu English-in 'The jack fruit tree' tiin an let a, e-journal-ah an chhuah a, novel tha bera thlan a ni.
Tatkawng rah leh a kungte pawh hian thu a sawi theih ka ring.
Lev. 16:2 LALPAN Mosia hnenah, “I unau Arona bia la, puanzar chhûng hmun thianghlimah,bawm chunga zahngaihna thutphah hmaah chuan eng lai mahin lo lut hauh suh se, a thi dah ang e; zahngaihna thutphah hungah, chhumah ka rawn inlar dawn a ni.
Hebrai 4:16 Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin,khawngaihna lalthutphah chu huai takin i hnaih ang u.
Tatkawng rah leh a kung chanchin chu beng a va verh ve...
Zahngaihna dawhkan rawngbawlna hi a hlu ngawt mai.IET-a kan kalpui dan khi a tha thlawt. Chhandamna emaw thlarau thianghlim malsawmna zawngtu tan te, simna puangtu tan te,thuk zawka rawngbawl tura inpe duh te tan maicham thianghlim a ni a. He maichama meialh hi alh zual zel rawh se tih hi International Spiritual Life Commission tawngtaina pawh kha a ni e.
Thiante u Zahngaihna Dawhkan (Mercy Seat) ngaisang leh hlut tak tak tute in ni tih ka hriatin ka lawm hle mai. ka nuna awmzia a neih ang hian mi dangteah pawh a neih ngei ka ring tlat a ni.
Zahngaihna dawhkan- a hming pawh hi a mawi hrim hrim mai a. Pathian zahngai thei kan nei tih min hriattir avangin. Thalaite leh naupangte ah pawh camp a pianthar tir tum ai chuan kan zahngaihna dawhkana an inhlanna awmzia hriatchiantir hi kan thatpui zawk lo vang maw! Hotupa chanchin hi zirlai tha tak a ni si a.
Post a Comment