ZORAM TANG FAN FAN

ZORAM TANG FAN FAN

I hnam fate hian khawi atanga lo kal nge an nih chiah chhui chhuak thei rih mah suh se, khawvelah hian mi danglam tak an nih zia hi chu a chiang khawp mai. India ram ropui tak state te zinga pakhat chu i ni ngei mai. Mahse i hnam fate hi khawvel hnam tumah hian India mi angin an hmu thei lova, India mi kan ni an tih pawhin tuman an awih lo. India ram pawnah chang a ni hlei nem, India ram chhungah ngei pawh hian I hming hre lo tam tak an awma. I hnam fate hi India mi, an unaute an nih hre lo hi a tam zawk an la ni hial awm asin. Chumi hre chiangtu sorkar laipui chuan theih tawp chhuahin India ram state zinga pakhat i nih ve zia leh i hnam fate pawh India mi a an in ngaih ngheh tlat theihna turin theihtawp an chhuah a. Programme hrang hrang an duanga. India hnam tawng zirna uar kawngah leh a zirtirtu train chung chang thuah te, T V serial lam atang te, politics lamah te theih tawp an chhuah mek a. Sum leh pai nise i hnam fate duh tawk tawk an pe a ni ber. Hmasawnna tur programme duan tihpuitlinna tur atana hman aia kawng danga luangliam a tam danah hian hman sen loh an hmu ni hialin a ngaih theih. I ram pumpui budet za zela 90 lai hi central atanga pek a ni a. Kan hruaitute hian intodelh tuma beih hah vak ai chuan a awmsa hai chhuak tam thei nih hi an in tihsiak niin a lang a. Hei hian sum leh paiah chauh ni lo, rilru lamah pawh retheihna kawngah nitin min hnuk lut thuk tial tial a ni. In todelh lo mi zahawm an awm ngai lo, chhungkua kan nih avanga kan nu leh pa kan hnekna tur chin chu a awm teh meuh mai. Mahse a chanve tal pawh thawk chhuak lo, kut dawh, mi laka dawvan kai nih reng mai hi zawng salah in hralhna mai a ni. I hnamfate hi he mi kawngah hian engtikah nge an harh chhuah ang aw zoram. Mahse kan la chhe zo vek lo tang fan fan rawh aw.

I sakruang hi kan chhuan viau che rualin mi tlangramte an lohna tak i nei a. Mi ram tlangte chu an hlum lian a, an nghet tha bawk a. Tuite an pai tam a, tlang chhipah te pawh tui hna tha tak takte an nei a. Nang erawh chu i tlangte hi an hriamin an awih vit vet a. Tuite lah hi i pai tam lo em em mai ni hian a lang a, mahse i hnamfate mamawh tawk chu i nei teh meuh mai. I ram leilungte hi a thaw leng a, an nghet lo em em a, chuvangin in kal pawhna kawng tha siamte a buaithlak em em a. Kan thawk ve fe tawh emaw kan tih pawhin furah an min chhe leh zel a. I ramah hian thil danglam tak Mau tam, thing tam khwvel ram dangin an hriat ve lohte hi a thleng thin a. Chung chuan i hnam fate a lo suat nasa hle tawh thin a. Chubakah ei chhiat avang a, hri tha lo leng ten i hnam fate nasa takin a lo suat sak tawh thin che a. Thli chhia te, min pui kum te leh harsatna chi hrang tam tak I tuar chhuah zia kan hria. Hetiang i ni chung hian kan pi leh pute khan kan Mizo nun phung leh khawsak dan nena in milna leh inrem riauna, thil hlu danglam bik nangmahah hian an hmu ni ngei tur a ni. Khaw chhak ram hla tak atanga lo chhuak an ni a. Kawl ram phai zawl ram tha pui pui an rawn kal kan a. I ram an lo thlen hian an thla a ngam em em a. A thlang lawka phai zawl nuam leh zau pui puite pawh chu pan thla zel tang e, ti lovin nangmahah hian an nghet tlata. Hei hian chhan eng emaw chu a nei ang. I hnam fate tan hian i la chhuah phal lo mai mai nge, hun i la ti lo zawk le. Nge anmahni zawn chhuah atan i dah le? ‘Naa chu ni se heti hian a ti tur’ tih ang zia zanga, ‘Japan chu nise ti hian an ti ang’ ti mai mai ram hruaitute chuan i hnamfate hi ram ropui tak an thlen lovang. Mahse tang fan fan rawh aw. In sak kawngahte, Tui hnianghnara neih dan kawngah te, kawlphetha siam kawngahte, Kawngpui siam thuah te, thalaite tana khel mual tha siam thuah te, tourism leh ei leh bar intodelh kawngahte, khawpui din dan kawngah te, I nih dan mila thil ti thiam i la nei em em ang, tang fan fan ang che.

Nangmah humhalh nan hian kan pi pute khan theih tawp an chhuah ve a. An thiam ang angin an humhalh ve che a. Mi dang lo lut turte leh i thing leh mau tichhetu tur leh phula rawn siam mai tur che nia an hriat apiang chu an lo do ve a. Nangmah chhan nan hian theihtawp an chhuah tak meuh a ni. Fing ve fu mah se, an pa chhiat em avangin mi ralthuam tha nei leh sipai rual nena tang chu an tan tihngaihna awm hek lo. An retheih pa chhiat chu sawi loh tlang hrang te te a lal thlih thliah an ni a, tan rual dan an thiam tawk bawk si lova. Theih tawp chhuaha an beih pawh in mi, sipai rual leh ralthuam tha pui pui neite lakah chuan tang zo ta ngang hek lo le, Kumpinu sorkar hnuaiah an kun ta a. Nangmah siamtuin a ruat dan a ni chek a ni ang chu, Kumpinu rual hian hre lova an lo biak thin Pu vana chan chin hriltu an lo chhuak ve hlauh mai a. Tichuan i hnam fate zawng zawng zawng chuan rinna thar chu an lo vuan ta a. Khawvelah hian hnam khat, tawng khat hmang, i hnam fate anga he rinnaa lungrual hi an awm lo hial awm e. Kum tam a liam hmain kristian an lo ni fai ta vek mai a. Sorkar a lo inthlak thleng a; India ram In dan (Independent) rualin i Politician-ten India sorkar hnuaia luh tithluin kum engemaw zat chhung chu hmar chhak lam zawng zawng vawn khawmna Assam state-ah i bei ve a. Chutih chhung chuan i chhungah hian sum dawnna lam emaw, zirna lam emaw, industry lam emaw, kawng tha emaw, i hnam fate tana tangkai tur leh chhenfakawm thil engmah din a ni lova. Fairel bel ruak thak, mei alh en tak meuha tam pui mitthi i tuar lai pawh in lainattu i nei lova. Mahse I tang fan fan a, i hnam fate chu I chhunga kamrah leh chung hun atana i lo vawn ruk ram bahratein i khaw chhuah pui hram a. I hnam fate thinurin an nu leh pate lakah vui vaina thu an thlen a. An thin ur chuan a chan chhe zawk tur an nih hre reng mah se hmawlh te an han lek ve iaih iaih a. Chu chuan neih belh chu sawi loh, kan neihsa zawng zawng pawh mei vapah a chantir a. Kum 20 chhung teh meuh silai leh thirkhaidiat a rorelna hnuaiah I hnam fate an kun a. Eng maw ti state nihna kai chho ve taa. I tang fan fan a, vawiin hi i hnam fate min thlen chhohpui ta a nih hi.

I unau state dangte hma sawnna phei khai ruala kal siam ve tur hian mamawh i ngah hle mai. I ram siam tha tur leh i hnam fate ti changkang tur hian party hrang hrangin hma an la tawh a. In thlan dawn apiangin a ti thei ber tur angin an in zuar a. Chanvo kan han bel a, hna thawh kawr emaw kan haktir kan tih laiin suit bawkin an lo inthuam leh thin si a. Sum leh pai nise anmahni hun theuhvah tam mangkheng an dawng theuh a. A hun en chuan zirtirtu ni tawh awm hi, zuntenu siam ang mai kan ni a. A bulah bawk tan a ngai leh thin si. Mahse Zoram tang fan fan rawh.

Tlang mite tana Pathian ruat leh siam i ni e: Zoram, siamtu chu nei chiang a ni. I hnam fate hian nangmah siamtu leh an tana lo ruahmantu che hi an thlahthlam tik apiangin an tuar ang. I hnamfate hruaitute hian zu leh sa chen a, an mite hmasawnna ngaihsak lova, hnam dang leh sorkar laipui lakah ngei pawh an uire chuan nangin theih tawp chhuah mah la i mite hi an ding chhuak lo vang. Nangmah siamtuin tlang mite himna kulhpui atan a ruat che a ni tih hi hai rual a ni lo. I chhak leh thlang, chhim leh hmarah sakhaw dang lian pui puiin an karche che a. Tlang mite hi chung karah chuan an awm ve thlih thliah a. Mahse i thenawm ram leh state khawiah mah hian tlang mite hi an him tak tak lo. Manipur a ex-Minister Pu Vungzaliana chuan “tlang mite hi zoram tih lohah chuan khawi dangah mah kan him lo; Zoram hi Pathianin tlangmite kulh atana a ruat a ni a, chuvangin zoram muanna tider thawng leh tichhe thei tur zawng chuan tu hnam mah hian harsatna siam lo ila a tha ber a ni” a tih hi a dik thlawt a ni. I chhunga tlang mi hnam chi hrang hrangte hian pumkhat tlang mi theuh pum khat kan nihzia leh chu aia thuk zawkin Kristaa pumkhat kan nihzia hria a I ram chhung muanna kan humhim theuh hi a pawimawh tak zet a ni. Tichuan he India ram ropui tak chhungah hian I unau dangte aia sang zawkin khawsakna kawng engkimah kan thang thei ang. Chutiang ni chu a la thleng dawn zoram tang fan fan rawh aw.


I lo changkan ve nan leh i hnam faten rual an ban ve theih nan nangmahah hian tihpuitlin ngai nia ka hriatte kan au chhuahpui ve ange aw.

Politics: Hmasawnna daltu lian ber pakhat chu Political Party hi a ni. ‘Party a awm tur a ni lo’ ka tihna a ni lo. Political party-te hian party member tur an zawng nasa lutuk a. Mi kan tlem si, kan vaiin member nihna nei vek kan ni a. Hei hian Kan Pathian biakna Kohhran lam thlengin a nghawng a. Kohhran member kan nihna aiin partya kan nihna hian kan nunah awmzia a nei ta zawk hial emaw tih tur a ni. Party khata awmhote hi kohhran pawl khata awmte aiin an in pumkhat mah mahten ka hmu. Chu chuan kohhran chhungah inremlohna, inhmuh mawhnate a siam a. Inthlanna lamah ni se, nutral an awm loh avangin Political party te tan an policy leh hmasawnna programme duante hmanga inzawrhna tur tumah an awm lo. Kan party candidate a nih phawt chuan tu pawh ni raw sek sek, vote hrim hrim angin a kal. Party-te campaign dan ber chu policy zawrh ni lovin, party dang member chhuhsak a ni a. Chu chu an hlawhtlinna an tehna ber pawh a ni. An in lawmlut nitin mai a, an haw haw dur dur reng mai a ni. In thlan a lo zawh meuh chuan chunghote chu a zarzo tur zawngin an han intihsiak leh a. Inthlan dawn laia kut benga an lawluhte kha an in huphurh tawn leh tham a. Mipuite hi chutiang a lak theih leh hneh theih, mahni mimal hamthatna uma thleng tlawr zuan kan tam avangin Political Party te tan ram hmasawnna vak tilovin a sorkar reng theih. Ei ru teuh mah se, kan party a nih miau avangin kan thup a, kan hum a, kan awih lo der tlat zel tho. Chu chauh a ni lo an eiruk a zarah khan tlem an lo dawn ve avanga lungawi an tam. Aw, i ram mipuite za zela 80 tal hi nutral nise, Politician-ho hian an policy zawrh se lo buk thin sela, an tlin hnuah chu chu an tihhlawhtlin loh chuan an han zilh fak fak mai tur a nih teh lul nen. Mahse e, Chutiang ang ni chu a lo la thleng ang, zoram tang fan fan rawh aw.

Zahngaihna Dawhkan (Mercy-Seat)

KA NAUPAN tet deuh lai chuan ka pi leh pu (ka nu Nu leh Pate) zuiin Roman Catholic-ah ka inkhawm ve thin a. Kum sawm ka nih hma in (ka kum chiah ka hre ta lo) Sipai pawlah ka let leh a. Zan khat chu Naupang Inkhawm Nilai thawhtan zanah (Other Y P Meeting) ka inkhawm a. Captain Saidawla kan Commanding Officer-in Inkhawm min hova, kan hlim khawp mai a. Naupang Sipaia lut turin min zirtir a, sawi rual thei turin thutiam te min vawn-tir a. (Chuta tang chuan vawiin ni thleng hian Naupang Sipai thu tiam chu ka theihnghilh leh ta reng reng lo. Palh hauh lovin ka la chham thei a ni) Major chuan Isua Lal leh chhandamtua pawm duh te chu Zahngaihna Dawhkanah kuna, Pathian hnenah kan thutiamte chu thlen turin min sawm a, ka va kun ve a. Isua chu Lal leh Chhandamtuah ka pawm ve ta.

Nikhua a lo rei a, kan lo tleirawl chho va. Tum khat chu Christmas lai hian thian zahovin Christmas sa tlemte lain kan lo kang a. Chu chu an lo ngai sual ta phian mai si a. Kan mualpho ang reng hle a. Ka nu ka hlau em em mai a. A lenkhawm hlanin keimahin Inah ka awm a, a lo haw tih ka hriatin pawnah ka chhuaka. Kawtah kan in tawk ta si a. Min hau hrep dawn emaw ka ti a, mahse 'Mama Zahngaihna Dawhkanah kun la ngaihdam dil ang che aw!' min ti a. Kum hlui thlah zan, Zan lai Inkhawm-ah chuan ka kun ta ngei a. Ngaihdam ni hliah hliah hian ka inhria a. Ka thianteho hnenah pawh 'kei chu Lalpan min ngaidam tawh' ka ti hial a, min nuih mai mai a.

Hun a lo kal zel a, Mizoram a lo buaia Ramhnuaiah te kan han ti ve zar zar a. Kum 1967 kum tawp lamah khan Campaign Inkhawmah Pathian aw ka hria a. Mizoram mai ni lo, Ama Lalram zawk chhan turin min kova. Zan a rei tawh hle a. Zanlai vel a ni a, Chumi zan la la chuan keimahin kan Biak In, kan khua Chhawrtuia tlangsangber laia awm-ah chuan ka kal ta a. Zahngaihna Dawhkan ngai bawkah khan ka han in hlan leh a. Chuta tang chuan a ni Lapan 'Heta tanga hla takah ka tir ang che' tia Cachar ram lama min tirh tak daih ni.

Zahngaihna Dawhkan hi ka tan chuan ava hlu em ve aw. Chu ka zahngaihna Dawhkan Kunna-ah chuan 'Sim rawh u Vanram chu a hnai twh e' tih hi a in ziak a. Kan Biak In chu Vaiin min halsak a. Kan khua an khawm a, rei tak a ram a. Chumi hnuah lut lehin Biak In chu hmun dangah an sa ta a. Mahse kan Biak In hmun hluiah khan Cement in Zahngaihna Dawhkan 'Sim Rawh u Vanram chu a hnai tawh e' tih in ziak khawtlangin min siamsak a. Chu chu ka kal changin Inhlan thar nan ka hmang thin. Zahngaihna Dawhkan ka tan iva hlu em!!

Gerizim leh Ebal tlang

17 October 2008 khan kan nupain kum tam tak kal ta atanga fiah leh hriat chian ka chak em em, Ebal tlang leh Gerizim tlang in kar ruam mel hnih laia zau Pathianin 'Natural amphitheatre' atana a lo siam hi kan finfiah thei ta. Israel fate Aigupta atanga Mosia hruaia an chhuah khan Jordan rala an la awm laiin Mosian Joshua hnenah helai ruam chanchin leh a awmna laite chiang takin a hrilh a. Chumi ruamah chuan Israel fate zawng zawng hruai khawm a, Pathian thu pek an zawm chuan malsawmna an zawm loh chuan anchhe dawnna ni tur chu chhiar chhuak turin a hrilh a. Israel hnam 12 te chu hnam ruk ve ve a then a, Ebal tlang leh Gerizim tlangah chuan dah turin a ti a. Ebal tlang lama mite chuan anchhia an entir ang a, Gerizim tlang a mite chuan malsawmna an entir ang. Mosia hrilh ang tak hian Joshua chuan a ti ta ngei a (Joshua 8: 30 - 35). Ka zawhna chu 'Engtinnge aurinna hmanrua engmah la nei si lo khan Ebal tlang leh Gerizim tlang mel hnih laia zaua mipui sang tamtak tling khawm khan an vaia Amen rual thei tura Puithiam aw kha an hriat vek theih? tih hi a ni.

Gerizim tlang chhipah kan han chuang chhuak a, kan hnuaia khawpui pawimawh tak mai Shechem (tuna Nablus an tih) chu kan zuk thlir a, a hlat teh reng nen an thawm a ring em em mai a. E khai, a chanchin kan lo hriat hi a dik theih ngei dawn hi kan ti dun a. Chuta tanga kan chhuk hnu chuan Gerizim tlanga Samaritan khuaah chuan Samaritan Museum kan en a. Chuta an Director Mr Husney W. Kohen chu kan kawm a. Kan zawhnate chu kan han zawt a. A lo phur hle mai a, 'Vawiin ni thleng hian Ebal tlanga mi leh Gerizim tlanga mi pawh hi a la in biaktheih a lawm, Pathianin helai ruam hi danglam takin a ruahman a ni' a ti a. Chu chauh ni lovin Ebal tlang chu anchhe entirna a nih angin engmah a tha thei lova, Gerizim tlangah erawh chuan hei in hmuh angin khaw nuam tak a awm a, thlaite pawh an tha a ni' a ti. Gerizim tlang bakah Samaritan mi ngei hmu a, chibai a, thlate kan han lakpui ta mai te chu lawmawm kan tiin, Pathian min hruai dan ropui kan ti hle. Mr Husney chuan Samari mite chu mi 750 chauh an ni tih min hrilh bawk.

Gerizim tlang leh Ebal tlang inkara Shechem khua chu Abrahama Puan In kaihna, Israel faten Aigupta atanga an chhawm chhoh Josepha ruhro an phumna, Jeroboama Juda lalte atanga a intih hran a Khawpui atana a hman a ni a. Samari hmeichhia leh Isua Jakoba tuichhunchhuaha an inbiakna leh Israel history a thil pawimawh chi hranghrang thlenna a nih avangin phur em emin tlawh turin Gerizim atang chuan kan tlan liam thla ta a. Vanduaithlak takin Palestine khawpui buaiber lai a lo ni tlat mai a, luh min phalsak ta si lova, lungchhe em emin Jerusalem lam kan pan leh ta a ni. (Heng thu hi chiang zawkin kan zinna chanchin a bua kan ziak mekah tihlan a ni e)

Mi dangte tana nun pek

Tsunami, Indian ocean tiphulh bulh bulh a, mipui sang tam tak nunna lemtu leh tithlabartu kha kan la hre theuh anga. Khami tuma Salvation Army chet ranzia leh thawh thatziate, vawiin thlenga, Sri Lanka, India leh Indonesia-ahte hna kalpui mek a la nih dan pawh kan hriat theuh ka ring e.

A hnu thla hnih lekah India chhim lama tanpuina hna thawhte enthlithlai turin General Larsson- an kan nupain min tir a. Kan han thlen chuan Sangha mantute lawng engemaw zat an lo siam thatsak hman tawh a. Heng Sangha mantute hian tuipui hi an nitin eizawnna hmun a ni a, tui an thiam em em a, lawng kar an thiam em em bawk a. Mahse Tsunami in an sawisak meuh chuan thlabarin an khur a. an lawngte chu siam that ni teh reng mah se, tuifinriata let leh zai an rel thei lo. An thlabar a, ni danga an nel em em an thlawhhma, tuifinriat chu a tihin an tih a ni. Mahse sangha man chu an nitin eizawnna, chhungkaw chawmna a ni si. A awm lo hauh lo, hlauhawm tak tak a lo thlen chuan kan experience leh thiamna neih zawng zawngte pawh hi an hman tlak tak tak loh chang a awm thin a ni. Petera leh a thiante pawh kha an nitin eizawnna hmun ngei Galilee dilah a ni thlipuiin a nuai a, an mangan em em a, thlaphang mangang a an zirtirtupa, nitina an zui thin pawh hmuithla hmuha an hmuh mai ni.

Kan han thleng chu an lawmin min thlamuanpui em em mai a. Roman Catholic Fatherte pawhin chung sangha mantute chu an mite an nih avangin kan kalna apiangah min zui a. Salvation Army in lawng an lo siam thatsak tawhte chu hlan turin min ngen a. Kan hlan zawh chuan Sanghamantute chuan 'Tuifinriat hi Tsunami hnuah kan vawi khat kal lehna tur a ni a, In nupain min va kalpui ula, chu chuan min thlamuan ang' an ti ta mauh mai a. Zoram luiah te chuan lo hleuh ve thin tho mah ila, Tuifinriat zau pui mai ,mit tlin tawk tawka cham dum kuk, so bulh bulh mai kara lawng te reuh te, dahlau tak leh nghala han in khalh kual chu kan zuam lo hle mai. Kan lawng chu let palh ta sela keimahni chuan vaukam kan in vai thleng zo dawn lo tih kan hre sa reng. Mahse thlamuan ngai, an bula kan awm a thlamuang, Pathian mi kan ni tih an hriat avanga min thlamuanpuituten min nghak si. Kan lut ve ta tawp mai a. a tirah chuan muang changin an kal a, a rei tulh tulh a, an chak ta tulh tulh mai a, kan rin aia thui thui min tlengpui ta, a zamawm duhte asin. 'Hlau leh khur chungin Thlaphangte thlamuan turin kan in pe a. 'Thlaphangte thlamuanin an awm a, thlamuantute kan thla a phang' a ni ber mai. Mahse kan hnena awm Lalpa avanga min thlamuanpuitute thlamuan theia kan awm kha kan hlimna leh lawmna a ni. Krista pawhin lungngaih thlaphan, mangan tuarin kan tan Kraws-ah khenbeh thihna thlengin min tuarsak a. 'Chhandamtu a thi a, thi turte chhandamin kan awm' a ni si a. Chu chu Pathian mite rawngbwlna chu a lo ni e.

CHIAHPUAM LEH INBUM DAN CHI HRANG HRANG

Lungleiah thian dun Pu Dara leh Pu Hrima hian Pheikhawk dawr in chhak thlangin an nei a. Tlangval pakhat hian 'Pu Dar i pheikhawk ang deuh hi Pu Hriman a nei a, lehlam hi ka la ang a, kan enmil teh ang aw' a ti a. Pu Dara chuan 'aw' a ti ve mai a. Pu Hrima hnenah a kal leh a, 'Pu Hrim i pheikhawk ang deuh hi Pu Daran a neiin ka hriaa lehlam hi ka la ang a, kan enmil teh ang aw' a ti leh a. Pu Hrima chuan 'aw' a lo ti ve leh mai a. A vei lam leh a dinglam a lo la si a, a kalbo daih a sin. Pu Dara leh Pu Hrima chuan an hriat chhuah hnu chuan a lehlam ve ve chu an thawhkhawma pakhat hralhin an hralha a man an insem ringawt.

Pu Hranga Jail rawngbawl ve kha asin!! Ni khat chu tlangval pakhat hian 'E kha pu Hrang in dam maw, en teh Jail atanga lo chhuak ka nia, Jaila i thu sawi khan min hneh thei lutuk a. Hei ka chhuak a thil tihsak ve che ka duh a. Motor khalh tur ka hmu a, Silcharah ka kal dawn Buhfai i duh chuan ka rawn hawn ang che. Bagah Rs 200/ chauh a nia' a ti a. Pu Hranga chuan 'a ni tak maw, hei Rs 200/ chu aw, ka va lawm dawn hetah a to ropui si a' a ti a. A tuk tlaiah chuan a lo kal leh a, 'hei Pu Hrang kan liam dawn a, bag khat chauh maw in duh' a ti a. Bag khat man Rs 200/- a pek belh leh a. Ni hnih hnuah a lo kal leh a, Ka rawn thlen taw a, bag nga ka nei, company pengah Motor ka dah a. En laiin a tih chi si lova, tlaiah Temple bulah min lo nghak dawnnia, in duh belh loh chuan mi dan ghnenah ka hralh mai ang a' a ti a. An it tawh si bag khat dang man rs 200/ an pe leh a. Tlaiah chuan an nupain Temple kawtah Vaivakawn kawng lam hawia reife an din hnu pawhin an nghak chhuak zo ta lo a ni.

Chiahpuam chanchin hian zofate a chim hneh hle mai. Zoramah chauh a ni lo, England, USA leh ram hrang hranga zofate titi pui ber pakhat a ni. Heti taka a darhzau chak na chhan chu zofate inkungkaihna that vang kan ti thei ang. Kan In pui Aizawl leh zoram chanchin hi a thlen ni niin kan hre ve thei nghal deuh zel tawh a ni. Globalization age-a awm kan ni bawk a.
Ar talh dan chi khat chauh a awm lo'' tih ang deuhvin inbum dan hi chi khat chauh a awm lo.
Chiahpuam pawh hi inbum dan chi khat a ni ve mai. Buma awmte hi hmuhsit emaw diriam emaw ngawt tur an ni hauh lo. Biblein 'bumin awm suh u' a ti lawm lawm chung pawhin khawvel mihringte hi tum khat tal buma awm tawhte kan ni vek mai. Chiahpuam ang deuh hi Sap ram (England) ah hian an lo ti ve tawh thin a. Pyramid an ti a, kum li lai an ti hman a, mahse an man ta phiar a. Tlem lai deuhva Zoramah pawh lar tak Amway ang deuh khan down line an nei a. A hlawkte chuan an hlawkpui em em a, mahse tute emaw tuartu awm lo chuan a hlawk theih miah loh. Chiahpuam pawh tuten emaw an tuara tuten emaw an hlawk pui a ni mai. Inbumna reng reng chu chutiang vek chu a ni. India ram state dangah pawh an ti ve thin tho mai. Tuna Londona awm kan thianpa Petera Tamil mi pawhin, ka pan min thihsan a, kan rethei deuh va. Sum tuak nan i zawm ve teh ang ka ti a. Kar khat ka zawm a, mahse ka hlawk pawhin tuten emaw an tuar dawn tih ka hriat avangin ka bansan leh ta a ni a ti.
Zoramah hian Financial Institution te tak te te, pawisa khawn kual chi an lo chhuak zauh zauh tawh a. A tirah chuan tha awm takin a lang a, an hlawk ve leh an khara an bo leh mai thin a. Pawisa chan tamtak an awm tawh a. Mahse a chi thar a lo chhuak a, hmana mi ang kha chu a ni lovang tiin kan bawh leh a, chutiang zel chuan Chiahpuam kan thleng chho ta a ni ber e.

Thenkhat chuan 'hei hi kan inzirna tur a ni ang, kan tan a tha ang' an ti a. Mahse a ni chuang lovang. A lo chhuah leh hun chuan hmel danglam puin thar varin a lo chhuak anga, tute emaw chu min bum leh tho ang. A in venna atana ka advise ve chu:
1. Lal Isuan 'sum ngah hi mihring dam chhan a ni love' a tih hi vawngin zawm ila,
2. 'Tangka sum hmangaih hi sual tinreng bul a ni' Paulan a tih hi zawmin hmangaih lo ila,
3. Kut tling lo thil it hi bang ila,
4. Mahni unaute bum hi sual lian tak Pathian huat zawng a ni tih hria in ti tawh lo ila.

Mary leh a Bible

Mary Jones hi Wales ram Tyn-y-ddol Cottage, Llanfihangel -y-Pennant khawperah christmas hma lawkin a piang a. Kum nga birth day a lawm hmain a pain a boral san a. A nu nen harsa takin an nung chho ta a ni.Chutih lai chuan School kal lkual an tih mai hmun khata zirtir lova hmunhrang hranga zirtirtu kal kual Thomas charles-an a hawng a. Mary pawh chutah chuan a kal ve a, rei loteah ziak leh chhiar a thiam thuai a. Chung lai chuan Bible hi a vang em em mai a. Farmhouse pakhatah hian varandha Dawhkanah Bible hi a awm a, Mary chuan a chhiar chak em em mai a. Aneitunu hnenah chuan chhiar a dil t chawt a, phal takin a lo chhiartir a. Mahse Mary chu a lungawi mai lova, ama ta ngei Bible neih a duh tlat a. Tichuan a theih ang angin pawisa a khawl ta a.

Kum engemaw zat hnuah Bible leina tur chu lo ngah pawh nise khawnge a lei ang. Thil mak tak mai chu, Thawhtan ni khaw chhe em em mai hnuaiah kum 15 a nih laiin a dan pangngaiin Penybryniau Mawrah Bible chhiar turin kein a kal a. Pa pakhat sakawr chung chuang hi a tawk a. Chu pa chuan "Nula khua a chhiat teh reng nen khawnge i kal dawn" tiin a zawt a. Mary chuan Bible chhiar turin Penybryniau Mawr-ah ka kal dawn ka pu a ti a. Engatinge chu chen chenah Bible chhiar tura i kal a ti a, mary chuan Inah Bible kan nei ve lova, hei pawisa ka tuak ngah tawh a, mahse leina tur ka hre si lova" a ti a. Mary chuan a tawh tur dik tak a tawk a ni. A mi tawh chu Thomas Charels Bala khua a mi Bible hralh thintu a lo ni reng a. Welsh Bible London atanga a lo thlen thuai ka beisei a, i pawisa chu rawn keng la Bible ka lo pe ang che an ti chu, Mary chu a lawm hle mai, boruaka thlawk kang ta hiala a in ngai a ni.

Bala chu an khua atangin mel 25 ai maha hla kawng chhe em em mai lehnghal a ni a. Kum 1800 kumtir lamah Mary chu ke ngatin Bala kal tur chuan a chhuak ta a. Bala a thlen chuan Thomas Charles chu an zawng chhuak a. Ava hmuh chuan Thomas pawh chuan a lo la hre reng a, mahse vanduaithlak takin Bible chu a lo la thleng lo tlat mai. Mary chu a tap ta a, Balaah tumah hriat a nei si lova, Bible lo thlen hun nghaka lo thlenna tur a hre si lo chu a mangang hle a. Mahse Thomas chuan a Ina hna thawka a chhawr thin Catrin Sion hnenah a thlentir a. Chutah chuan zan hnih a riak a, Bible chu a lo thleng ta. Thomas pawhin chu nula Bible duhzia chu mak a tih em avangin Bible pakhat manin Bible pathum a leitir a. Chumi nia Mary lawmzia chu sawi chhuah thiam chi a ni lo. Heng Biblete hi pahnih chu vawiin thlengin hmuh theihin a la awm a, pakhat chu Wales National Libraryah vawn a ni a, pakhat ama pual bik chu Cambridge University Library-ah vawn that a ni. A pathumna erawh chu a chin hriat a ni lo.

Thomas-a In Bible a zawrhna leh Mary Bible leina In hi tunah chuan Barclay bank in an luah a, mahse Thomas a Bible vawnna Shelve te chu a ngai a ngaiin an la dah tha a, heng chanchinte pawh hi a tlawhtu apiangte hnenah an lo sem zel bawk a ni.

Kan nupaa Wales kan kal tumin Rev. Lawmzuala (Tunah Durtlang Theological Collegea thawk) te nen kan va tlawh a. Thlalak hi Thomas-a In kawtah kan lak a ni e.

Scotland tlangram lamah

Scotland tlangte hi an mawi em em mai. England ram chhungah pawh an hmun mawi ber ber laite an ni. Thlasik lai hi a vawt hle naa vur tlate hian tlang mum tha tak takte hi an cheimawi leh zual a, hmuhnawm tak a ni. Pu Jimmy-a hovin kan kal a, englai maha kan la chenna ngai loh ram mah nise lung a tileng hle mai. Heti khawpa an mawi chung hian zoram tlang hriam tak tak te nen duh min thlantir ta sela Zoram nge nge chu kan la thlang zawk tho ang.

London Millennium Bridge-ah

Rev. Lawmsanga leh Mamuani te chhung hi Birminghama awm kan thian leh unau te an ni a. Kan in tlawh tawn zauh zauh a. He thlalak hi London an lo kal tuma Millennium Bridge a lak a ni. Hun a lo kal zel ang a, zoram lama kan hawn chhoh hun a lo thleng ang a, heng nite hi kan la ngai viau ang.

England tlang sangber (Snowdon) ah

Snowdon tlang Wales a mi hi England ram tlangsangber a ni a. Electric train compartment hnih chauh nei hi tlang chhip thlengin an lawntir a. Vur a tlak deuh reng avangin a vawt em em mai a. Rev. Lawmzuala te nen ni khat chu kan han lawn ve a, kan lo in ha lum tawk lova pawnah pawh kan awm rei ngam lo. vawt tak a ni.

Kan la ngai dawn asin aw - khua reiah.

Children are a heritage from the LORD

Tu leh fate hi Lalpa laka kan ro chan kan nun chhungrilber luahtu leh min tihlim bang lo tute an ni. Ram hla taka awmbosan keini ang phei hi chuan an thlalak hi kan en zing dup mai a. an lo nuih sang leh kan nui sang a, an lo nuih loh leh lawm nuih theih in ring ni awm fahranin kan han lawm a; kan be mawlh mawlh hi a ni hrim e.

(Puii & a tu-te..)

Let us go to Bethlehem

(Photo:

Birthplace of Jesus)

One thousand years before the birth of Jesus, Samuel (with fear and trembling because of King Saul who was rejected by God) visited Bethlehem to anoint David, son of Jesse, to be a king, from whose descendants Jesus would be born. Samuel in reply to the elders of Bethlehem said “Yes, in peace; I have come to sacrifice to the Lord. Consecrate yourself and come to the sacrifice with me”. There he anointed David to be King of Israel and paved the way for the birth of Jesus. (1 Samuel 16: 1 – 13)

“Let’s go to Bethlehem and see this thing that has happened, which the Lord has told us about” said the shepherds to one another. So they hurried off and found Mary, Joseph, and the baby who was lying in a manger. When they had seen him, they spread the word concerning what had been told them about this child. The shepherds returned, glorifying and praising God for all the things they had heard and seen - which were just as they had been told. (Luke 2: 15 – 20)

According to William Barclay it is most likely that these shepherds were in charge of the flocks from which the Temple offerings were chosen. If that is true, it is no wonder that the shepherds who were watching the sheep that could cleanse the sins of men for only a while, left their flocks to worship the Lamb of God who would cleanse the sins of the world permanently and returned rejoicing and praising God. (The Daily Study Bible).

The grotto, marked as the birthplace of Jesus in Bethlehem, is visited by thousands of Christian pilgrims and tourists every year. Bethlehem (The House of Bread) where Jesus (The Bread of Life) was born is still giving the bread of life to those who are spiritually hungry. The young John Lennon may have once irreverently boasted that the Beatles were more famous than Jesus but the Beatles have long since broken up and now in 2008, Sir Paul McCartney one of the two remaining and perhaps the most famous and successful of the Beatles, visited the birth place of Jesus on 24 September and bent, like all other visitors, to enter the gate of the Church of The Nativity.
(You have to bent to enter the gate of Church of the Nativity - "Enter through the narrow gate..Matt 7:13)

Let us go to Bethlehem (the House of Bread) this Christmas to see Jesus (the Bread of Life) and return glorifying and praising God for the gift of Salvation and to proclaim peace to the world.