JERICHO KULH CHIM: (Joshua 6: 1 - 27) Hei hi Jericho kulh Joshua hova an hual chim kha a ni. Joshuan anchhia a lawh a. He Jericho khawpui hi rawn din apiang chu anchhe dawngin awm rawh se....' (6:26) ti hian din thar lohvin Lalpan a mite a hruaina kawnga a thil tih mak hriatrengna atan a awm ta reng mai a ni.
ZAWLNEI ELISHA TUIKHUR: He Tuikhur hi Zawlnei Elisha tuikhur tih a ni. A chhan chu Jericho khaw upate ngenna anga Elishan tui thianghlim lo a tih thianghlimsak kha a nih avang a ni. Lalte pahnihna bung 2: 21 en teh "Lalpan heti hian a ti, 'He tui hi ka tithianghlim tawh e, tun achinah chuan thihna leh nau chhiatna a awm tawh lovang,' tiin. Mihring hi chhan chauhvin an nun glova pathian kaa thu tin chhuakin an nung zaw a ni. Lalpan a sawi tawh chu a thleng zel a. He tui pawh hi tui thianghlim tak lei chhungril atanga rawn irh chhuak tawp mai. In nghal theih mai a ni. 
THEIPUI KUNG: He theipui kung hi Jericho khawpui kawng thuam lai taka awm a ni a. Zakaia lawnna theipui ngei kha a la ni e an tih chu. Tlangval uangin 'Zakai lo chhuk rawh' a tihna chhan te chu theipui hi a ler lama rah lova a bul lama a rah vang a nia, te an ti thin a. Israel ram theipui chu kan theibate ang deuhin a ler lamah an lo ah tlat. A bul hi a kawrawng tawh a, a ler lamah pawh a zar a ro nasa tawh hle. A hnah erawh a la duah tha khawp mai. (Luka 19: 1- 10)
TEMPTATION MOUNT:
He tlang hi Thlemna tlang tih a ni a. lal Isuan ni 40 leh zan 40 chaw a nghei a, a ril a lo tam hle hnua tlemtu lo kalin a thlemna tlang kha a ni. Jericho khaw thlang lam pangah he tlang hian a rawn khuap lurh a. A pangah hian Monastery a awm a, chutah chuan sakhua avanga in vawng thiam hlim rual engemaw zat an la cheng a. A tlawhna hi a hautak em avangin Cable Car (Thirhrui kawng) inkhai chhohna an siam a. A kal tanna station chu elisha tui tihthianghlim bul maiah hian a ni a. chuta tang chuan an in khai chhova tlangah hian a tlawhtute an han lawn thin a ni. (Luka 4:1- 13) e teh.
6 comments:
tlawh ve a va chakawm em aw... a chanchin kan hriat thin, kan lo lawm ve em emte a hmun ngeia kala mit ngeia hmuh theih chu a va hlu dawn ve.
Hmu-a lawm apiang mi vannei ber an ni
En leh chhiar a nuam viau thin mai...a tuipuiawm hle a ni.
MMEM a interview kha comment ka hre nual a, miten an hlut viauvin an sawi. A lem nena han tarlan nghal zel hian sawi mai bakah a tichiang lehzual. Video kha en a nuam viauva hetia ziak chhiar leh phei hi chuan a chiang leh zual.In zarah kan zin ve a ni hrim e.
Zawlnei Elisha Tuikhura tui hi in nghal mai theiha thianghlim a nih chuan a hmuna kal nge nge chuan in in ta em le. Kei chu ni ila ka khiat ngei ang. Thlawhhma hmun khata tui thianghlim tak lo tling piau thin 'Tuivamit' kan tih ang a nih duh hmel hle mai a.
Kan thurin Bible dikzia hi chu aw. Ring tawp ila, kan tisual lo nge nge, ka mimal nitin nunah pawh a dikna ka hmu zel chu a nih hi.
Kum sang tam ral hnuah pawh _Tuikhur ṭha tak_ a la ni reng thei hi a ropui ka ti hle mai. Kan ramah hi chuan kum 20/30 a liam hnu a kang chat ta mai tuikhur a tam hle si a. Pathian mi, Zawlnei Elisha hmanga tihthianghlim zet chuan a daih reiin thil inhmeh tak a ni. A lunglenthlak a, a hmuhnawm tel bawk. Kan thlarau min hruai delh delh a ni ber e.
Post a Comment