ZORAM TANG FAN FAN (chhunzawmna)

Economics a ding chhuak turin enge I hnam faten an mammawh ber:

Economics a ding chhuak tura I hnam fate mamawh a tam mai. Power, In kalpawhna kawng tha, Tui hnianghnar te hi an pawimawh teh meuh mai. Mahse tun maia kan mamawh em em ka sawi duh chu I hnam fa, ei zawnna kawng hrang hrang neite ‘in mamawh tawn vek a siam’ hi a ni. Chu chu enge a awmzia? E le, tuna kan din hmunah chuan Dawrkai hausa, Sum dawng hausa, Sawrkar hna thawk hausa in Lo nei mite tih turan ngaih an ti ve vek a, an thar tam hlei hlei a. Lo nei mitten an kham khawp aia tam pawh thar se, lei tur an awm lo va, hlawk chuang hek lo. Vawk vulh, Ar vulh ei zawnna a tling kan ti a. Chhungkaw tam tak eizawnna a hmang turin kan rawn a. Bul chu kan tanpui ngei, mahse chung mite chu Dan in kan humhalh leh si lova. Mi hausa leh force lam hotute hlei hleiin mi leh sa, an ran vulhte enkawltu tur, an lo nei tha leh si a. An vulh thau thei zawk bawk si a. Vawk vulha ei zawng turte tan hlawkna a awm lo. Aizawl leh Khawpui lian town ho zawng zawngah hian vawkvulh phal loh ni se. Mi hausa leh sorkar hna thawkin vulh phal loh ni bawk se. Ei zawnna atana hmang turte tan chauh vulh phal han ti ila, engahne chung mite tan chuan a hlawk loh teh lul ang. Chhungkaw sang li sangnga in eizawnna hlawk takah an hmang mai ang chu. Chutiang bawkin Ar vulh te pawh. Huan neihte thleng pawhin. Second hand zawrhte hi a titawk awmte eizawnna atan hmang ila, Sorkar hna thawk lianpui puiten bail te hi hawng hawng ve lo sela.

Assam Rifle hi chhuak ta sela: Mi tam takin an rin dan chuan Assam Rifle hi chhuak ta sela mi mal ramin a khat ang a, Sokar tan tangkaia hman tur engmah a awm lovang. Minister te pawhin an patta niin an sawi. Kum sawm lai liam taah khan tum khat chu Revenue Office-ah ka leng a, an ti ti ruk ka hre tlat a ni. Tun hnu deuhvah Chief Minister pakhat chuan chung zawng zawng chu kan thian fai zo vek tawh tiin min hrilh a. Tak tak a nih chuan a lawmawm ngawt ang. A ram hman dan turah hian ngaihtuah dan chi hrang hrang a awm tih ka hria. Ngawi teh, duh thu kan sam ve teh ang. Zoram hian kawng ngil hi kan nei thui lo em em mai a. Kan khawpuiberah pawh hian kan kawng ngil thui ber chu Governor gate atanga dak Inpui hi a ni mai awm a sin, nge Dawrpui phei. Khawpui ber e ti lovin awllen nia intihharhna tur tuallenna te hi kan tla chham em em mai si a. Chuvangin Assam Rifle hi an chhuah chuan Dawrpui Bungkawn atanga Dak In pui lang ruih turin Kwngpui ngil I siam phei teh ang. Tlangte hi kan rawt ang a, a inkar ruamte hi kan chhung khat ang a. A sirah Lungrem ni mai lo, concrete nghet tawkin kan siam ang a. A kam tuak tuak ah thing kan phun thelh ang a, Park nuam tak tak han siam phei zui mai ila, Motor kalna tur leh Kea kalte kalna tur lian tha tawk tak nen, Aizawl khawpui hi a ti khawpui sawt ngei ang. Lam mual hi chu statdium lung phum a nih tawh ang ngeiin tihpuitlin ni ngei se.

Khel Mual: Lam mual sawi takah chuan khel mual siam danah I kai lawk teh ang. I leilungte hi ka sawi tawh angina an awih vit vet a, khel mual siamte hi a awlsam lo em em mai. Mahse Naa (japan) chu ni sela chuan I thalaite hi laih zawl khera in khelhtir tum lovin, concrete leihkapui an dawh main ka ring. Kawr lian pui pui kap tur tha tak tak i nei a, I in ruahman dan chuan a hnuaiah Motor park, Office leh Restaurant te awm a, a chung zawla khel mual kan siam theih nan i in ruahman ni ngeiin ka ring. Chu chu i hnamfate hian kan la hmu chhuak thiam si lova. Bapminton Court tur lek talin han tichhin awm sela, a hlawhtlinzia hriain Football ground te pawh kan tichhunzawm mai tur a ni na a le. Concrete lai pawng deuh a sir lamah tui luan zel theihna in ruahman ila, a chungah lei chhah tawkin han chhung ila, phai tual hnim han ching khat tlat mai ila. Concrete chungah kan in khel tih pawh an hre lovang. Awih pangah khel mual kan siam duh a nih pawhin a chhak lam ko sang pui pui a laih a, a thlanglam lungrem chim leh mai thei a dawl dawl ai chuan, a zawl sa hi Concrete dawh zawm ila, a chungah lei chhah tawkin chhung ta mai ila, a min lo zawk ang a, kan hlawhtling awl zawk daih tur hi a ni a le. Vaivakawn field te pawh hi, tuna a field khu Car park ni se, a chungah khuan concrete in dawh ta mai ila, Khel mual changkang lutuk kan nei ni mai tur. India state dang zawng zawngin i leilung hi a nih ang anga kan hman thiamzia ha hipin an sawi mai tur lah ni. Ngawi rawh chutiang ni chu a lo la thleng ang, a ngaihna hria an la lo chhuak mai ang. I thalaite pawh la beidawng suh se, lo tang fan fan rawh.

Chanchinbu mite: I ram siamna atana tangkai tak tur pakhat chu Chanchinbu mite hi an ni a. Anni ho lah hian mipui rawng aiin Political party rawng hi an bawl nasa zawk emaw ni? Tan lam hi an neih deuh farin ka hria a, nutral Chanchinbu kan mamawh khawp mai. Engtinnge I hnamfate rawng an bawl ve ang? Information pek a, thil chhe pui pui thleng thinte chhuah ringawt hi an duh tawk ang tih ka hlau deuh thin. Political party ten an intiamna ang an tihpuitlin loh te, Department ho hmalakna tha tawk lo te. Veng chhung kawng chhe lutuk te a thlalak nena chhuahin, Tuikhur leh tui sem dan rual lote, leh department hna thawh tur an vil that tawk loh apiangte chhuah thin se. Heng hi chhuah chu an chhuah vet ho mai ti rawh. Mahse engatinge heng hi sorkar department te hian an mualphonaa an lak lohva an tihpuitlin chuan thin loh le? Kan khawpui kawng dungte hi engatinge rei tak tak siam lihva a awm thin le? State changkang ah chuan Ministerte hian zing office an thlen veleh a an tih hmasakber pakhat chu, tukin chanchinbuah kan department chanchin a chhuak em? Enge an sawi? Khawi laiah nge? Chu chu a tih that theih em? Tih hi a ni. Chief Minister fel chuan department mualphona thil an chhuah chuan a changtu minister leh department atangin explanation an call vat thin. I hnamfate hi chuan chutiang a Chief Minister leh a minister dangten an tih loh pawhin ‘an hna an tlin lo, min ngaihsak tak tak lo; min hmangaih tak tak lo’ tih hi kan ngaihtuah chuang miah lo. Thenkhat chuan chutiang tur chu a ni tih pawh kan hre lo niin ka ring, mipui lahin hre hek suh. Ministry in chutiang chu an tih loh avangin department enkawltute hian hna an thawh that loh pawhin hotute lam atangin zilhna a awm lova. Mipui chuan complain mahse a hotu lam an ngawih tlat chuan tension engmah an nei lova, an titha duh chuang lo. Burma sipai pakhat Thana an tih hian an sipai Kudama Motor ke ruk puiah a thianpa a sawm a. A thianpa chuan a lo hlau nasa mai a. Min man ang tiin a tang nasa mai a. Mahse a thianpa Thanan a sawm tlat avangin Motor nen an kal ta a, an va ru ta ngei a, an hlan mawlh mawlh laiin an hotupa chuan a rawn hmu ta ngei a. An hmingin a rawn kova ‘Thana, kha engtia tih nge I tum’ a rawn tia, Thana chuan a, hman nia I tih ang kha ka va ti ve lawk ag chu ka ti’ a lo ti sam et a, a thianpa chu a lo meng phawk nasa mai a. An hotupa chuan ‘va ti thuai thuai rawh u’ a ti a. an in then ta ringawt mai a. Chutiang ang sorkar hruaitute chu kan nei ta mai emaw tih a awl hle thin e.