Mizorama kum sarih lai Missionary-a rawn awm, Scotist mi James Kennedy-a khan 'Mizo hi lungleng hnam in ni, khua a that leh lungleng in ti a, khua a chhiat leh lungleng in ti bawk a' a ti e, an ti a. A dik hmel khawp mai, Mizo hian lunglen hi kan hre hle a ni. Hnam dang pawhin an hre ve ang, mahse kan hre zual deuh bik a ni awm e.
Kan lunglenna chhan thenkhatte chu: 'Nun hlui thlir leh dawn changin, Mahni khua lova awm a chhung leh khat leh then leh rualte hmu phak lova awmin, Hmangaihte nen inthen ni leh in awmbosanin, Sulhnu hlui fan changin, Hla lungtileng tak thiante nena kan ngaihthlakho thin play changin, Ramhnuaia kala Rengchal a lo kiu vang vangin, Ruah a sur cherh cherha in chhunga kan tawm mai maiin, Tlai ni tla turin kan ral tlang dul deuh riai a a chhun en raihin, Kan hmangaih chatuan rama min kalsan tawhte sulhnu en chang leh an kal ni cham lo thlenin, Khawtlang lunglen leh Hunpui a lo thlen dawnin; a bikin Christmas a lo thlen dawn a, mahni khua atanga hla takah hmanpui tur mumal tak nei lova kan awm changin. Heng hi kan lunglenna chhan leh hun tlangpuite chu an ni awm e.
Upa chuan Khawtlang Lunglen natzia hi an sawi thin a. Ngaihbik pawh nei chuang lovin an thil hmuh tlang leh lui kawr ruam, mihring chenin an lung a tileng em em ringawt mai thin a; an tap vawng vawng mai thin a ni an ti. Chutianga mi an awm chuan upain an thih a hnai a ni e, an ti thin. Hei hian Mizote hi lungleng hnam kan nihzia a tidik viau awm e.
Mizo Kristiante tana hun ropui ber Christmas a lo hnai leh ta, mahni khua atanga hla te khuaa awm, hmanpui tur mumal tak pawh la siam fel thei lo leh nei lote khua a harin lung a leng tan leh tawh ngei ang. A awm khawp mai!! Mizote hian Kristmas hi kan hlut em a, naupan lai leh vanglai huna kan hman dan hlimawm leh nuam kan tih em em sawi tur nei vek kan ni si a. Kristmas hman thin dan sawi chuan tawng kan in chuh nak nak thin a nih si hi!! Chuvangin he hunpui ropui tak mai lo thlen dawna lung a leng ruai mai a, kan hnim deuh ruih mai thin hi in dem theih ngawt pawh a ni lo ve, Lungleng hnamah kan lo piang bawk si nen!!
Engpawhnise, Rawngbawlna vang emaw, mahni hna tul vang emaw a khawhar taka hman a tulna hmunah kan awm si chuan ngaihtuah dan i thlak thleng teh ang u. Christmas hmasaber zana Mary leh Joseph-a te hun hman khawhar thlak dan tur kha i ngaihtuah teh ang. Mipui tamtak zingah khawhar em emin an hun an hmang a. A khawhar thlak mai pawh a ni lo, mi duh loh khualbuk atanga hnawh chhuah, ran thlunna Bawng zun leh ek hing hum hum karah Pathian Fapa, khawvel sual tlantu lo piang chu an sawngbawl dun a nih kha. Ava zahthlak dawn em aw!!! Chutia khawhar taka an awm lai chuan Berampu mi hmuhsit leh Phula an Beram riah chilh mektute hnenah Van lam zaipawl an lo lang a. 'Chungnungberah Pathian ropui takin awm rawh se, Lei chunga a lawm em em mihringte hnenah rem thu leng rawh se' an rawn ti hem hem mai ve thung si a nih kha.
Kumin Kristmas khawhar taka i hman dawn chuan hei hi ngaihtuah teh: Kristmas i hmanpui mamawh ngawih ngawih te bulah i awm tih hi; chu chauh pawh a ni lo, khawhar taka i hman a, Pathian Fapa Isua lo pianga chu i biaka i chawimawi mek lai khan tute hnenah emaw Van zaipawl an lo zai ve ngei dawn a ni tih hi. Chung mite chuan rei loteah an rawn zawm ve ang che. In ngaituah lungleng khawharin vui duh suh, rinnain chung lam thlir la, thlasik khaw thiang bo ruak vawt raih mai atang khian in hnenah ngei Van zaipawl chu an rawn zai ve dawn e. Chu chunglam aw chuan malsawmin a awmpui ang che/che u ang a; i Kristmas hman hun ropuiber leh hlawkber a chang mai dawn a ni.
Kumin Kristmas lo thleng tur hi nangmah mamawhtu, i hmanpui mamawh em emtute bulah i hmang em in ngaihtuah ang che.
