CHHAWRTUI KHUA

Khawhar lunglen zual ni deuhte hi a awm thin a, chutiang hunah chuan mahni seilenna hmun hlui lamah rauthla a leng thin. Ka naupan atanga kum 1968 March thlatir thlenga ka chet tlatna ram leh mual leh thian hlui te rilruah an lang uar uar mai. Ngai viauin sulhnu chhuiten han kalin han fang vel mah ila a hmunah pawh hmanlai kha an la ngaihawm tho va, engmahin a hnem tak tak thei tawh love. A hmunah pawh lunglen a zual ting mai a ni.

Chhawrtui khua hi Champhai Road a Kawlkulh khua atang khian chhim lamah Mel kua a ni a. A in karah Puilo khua, chhawrtui atanga mel ruk, Kawlkulh atanga mel thum a awm a. Chhim lamah Vanchengpui Mel sarih ah a awm a. Khawthlang lamah chuan Tuivawl ral Mel sarih a hlaah Tawitlang panga Maite khua a awm bawk a. Chhak lamah chuan Arro khua Tuichang ralah Mel sarih a hla bawk a awm.

Ka hriat theih tirh atangin YMA a ding tha hle a. Sum tuakna dang teh vak awm loh vang nge an fin vang hrim hrim Sipai Chhuti lo hawng hi an lawm ziah a; pawisa chung lai hun atan chuan tih tham ve tak kha an thawh zel bawk a. Sum tuakna tha tak a ni. Kan YMA president kumhlun chu Kangliana a ni a. Kolasib-ah nikum hmasa lam khan van kohna min chhansan ta nghe nghe a. Thalaiin kan zah em em a, thlan mualah thlan laihnaahte hian a lo kal tawh chuan tumah thu ngam kan awm lova. Lo thu mai mai pawh hi kan tho sung sung mai a, thlan chhunga luh kan in chuh sup sup mai thin a ni.

YMA bakah 'Tlangval Tang rual pawl' an awm a. Khamite kha an fakawm ka tiin an hna thawh kha a hun lai atan chuan a tha thlawt a ni. Mitthi lumen tur an awm apiangin zanlaiah Mizo chhangban kan leh Kurtai leh thingpui an sem ziah a. Khawhar chhungte leh tlaivar riltam te tan hlu tak a ni. Chumi ti thei tur chuan Buhban hmunte an nei a, vawkte an ser a, a hriak an dah tha a. Lumen ngaia thi an awm tih an hriat veleh an tlan khawma chhang an chiah a, an deng nghal a, Nula a dihsaktu an nei nge ni ka hre lo. An pawl hming chu 'Tlangval Tang rual Pawl' a ni si. An lo thawkrim awm hlein ka hre thin. Ka hriat dan chuan U Savawma te in kha an Headquarters a ni a.

Lo nei mite infuihna atan Buh za lawm kan nei thin bawk a. awm ni khamin Mual zawlah intihhlimna chi hrang hrang siamin Buh za chung lam nei zawng zawngte hnenah chawimawina an hlan thin a. An chawimawhna pek erawh chu Ser tawk te leh Serthlum te in awrhtir kha a ni mai a. Mahse chawimawina a nih avangin a hun lai kha chuan Lo nei mite fuih nan a tha em em a ni.

A khaw hmun chu a thlalaka a lan ang hian a bumbohvin a awih ve khawp mai a. Mahse a mi chengte chu fiamthu duh tak tak hlir an ni a, an fiamthu a sang a mahse tuman huat en enah an en lo. Mikhual tlangvalin nuam an ti thei hle, a chhan chu khawtlang tlangvalin an nulate lakah an thik ve ngai loh vang a ni. Rilru zau leh inpawh tak, chhungkua ang maia In zahnih dawn lai khua kan awm khawmna leh hun lai kha a ngaihawm thin teh e.