Jordan hian hnar pathum a nei a. 1) Leddan 2) Banias 3) Hasbany te hi. Hasbany hnar chu Hermon tlang sang tak vurin a khuh reng feet 9230 laia sang a ni a. Bania pawh hi feet 1080 laia sang a ni. Heng lui pathum infin hian Jordan lui pawimawh tak hi an siam a ni. A hnar pathumte hian Pathianin mi sual tana chhandamna lui a siamna thil pathum infinkhawm 1) Pathian hmangaihna, 2) Krista Isua inpekna leh 3) Mi sual thi mai tur intawkkhawmte chu min hriattir a.
Tlangsang tak atanga lo chhuak, a chhuk thei ang bera chak taka luang a, khawvel hmun hniam ber Dead sea Tuifinriat aia feet 1378 laia hniama a luang lut hian Krista Isua van chung sangber atanga lo chhuk a, khawvel hmun hniambera sual thukberte chhandam tura a lo chhuk chu min hriattir bawk a ni.
Dead Sea (Tuipui thi) hi Abrahama leh Lota Bethel tlang atanga an inthen lai kha chuan Ram ngaw dur tha tak, Lalpa huan ang mai, tui tam tak awmna a ni a. (Genesis 13:10) Lalpan Sodom leh Gomora mei leh kata a hrem takah khan tuna a nih angah hian a lo chang ta ni ngei tur a ni. Chuti a nih chuan Pathian hmangaihna in sual thukber a luh chilh angin Jordan hian mi sual, Mei leh Kata hrem tlak khawpa sualte hremna lipui chu a luhchilh ve a ni.
Jordan hi mihring ni ta sela sawisak tura a inpek nasatzia kan hre thei ang. Pathian hna thawh lanna turin Krista Isuan vuak thitlin leh Kross a khenbeh thleng a tuar angin Jordan hian vuak chah tum thum a tawk a. Joshua hoin (Joshua 3: 16) Elijan a vaw chat (2Lalte 2: 8) Elishan a vaw chat (2Lalte 2: 14).
Heng vang hian alawm kan blog hming atan ‘The Jordan’ kan tih ni.
5 comments:
A lo nih ngei hi, a lo ril em a ni.
Pathian hmangaihna ropuizia
Thu leh hla-in a hril seng lo
Van aia sang aw a zauzia
Sual hmun thim ber pawh a thleng zo....
he hla hian a sawifiah khawp mai
A fiah ta kuar alawm! Blog hming atan 'Jordan' chu thlan awm reng a lo ni e. Jordan hi Krista entirna atana hman a rem lehna chu, Israelten Josua hoa Kanan ram an luh dawna Jordan lui an kan ngei a ngai ang khan, ringtuten Van Kanan kan luh theihna turin Krista chhandamna kaltlang ngei a ngai hi a ni.
Jordan lui han tih hi chuan Zofate thinlai a kuai a, Tlang, Tuivai, Tuivawl, Tuiruang han tih vel ai ngawt chuan rilru akuai alawm. Pi leh Pu berte Jordan lui kama dinga nghakhlel taka chung lam ramtiam an thlir thei hi a lawmawm khawp mai a, ka lawmpui tak meuh e.
Chhiar pawh a manhla a, blog hming pawh hi a thain a mawi khawp mai.
Tisa leh thlarau lama hmasawnna tam tak an dawnte kawmpui lova, min share phal hi a lawmawm lehzual ka ti.
In comment ten min tilawm khawp mai. Jordan lui hi hun rei tak atanga ka lo zir leh chhut tawh a ni a, Thiama sawi ang hian Kanaan ram lut tura Israel faten Joran an kan ngei ang ngai angin, Krista kal tlang lo chuan van Kanan luh theih a ni lo. Kan kal tlang theihna tura Krista khenbeh a a awm anginJordan pawh vuak chah a ni ve leh zel pek asin!!! Thlarauva hre chiangtute tan chuan Krista pawimawhna hi hai der chi a ni lo. Hun kal tawh a, thil thleng engkim hian an kawk vek a ni.
Post a Comment