CHHAWRTUI KHUA

CHHAWRTUI khua hi ka seilenna khua a ni a. Ka chhuahsanna rei hle tawh mah se vawin thlenga ka khuaa ka la chhal a ni.
Chhawrtui khua miten an hriatlarna tak pakhat chu a Tuikhur hi a ni a. Khaw laili takah, Sih ruamah hian Tuikhur tha tak mai an nei a. Chu chu 'KHURPUI' an ti a. Chumi chhakah chuan a hnar kinah Tuikhur a awm bawk a, chu chu 'Luihnar' an ti a; a thlang lamah Lengkir hniamte hnuaiah khur hnih a awm a, Chung chu 'Hna pen' an ti a. Khurpui hi Chhawrtuineihlala chhun chhuah a ni an ti a. A thuk lam hi Feet nga vel lai a ni a. Tui hi a mawng atanga rawn irh chhuak a ni a. Lunghlir a ni a, a lung pawh a chang tha a, chumi mawng atanga tui lo irh chhuak chu a thianghlim em em a. Amaherawh chu a hna hi a tam lova, a kang deuh reng a. A mawnga tling khawm zu suak tur chuan Fian liang sei tak neih a ngai a. Fianthlir pangngaiin a phak loh avangin Mauin an zawm thin a. Chu chuan a kawngkaah hian kun lutin an zuk suak thin a ni.

Kum 1955 hma lam zawng kha chuan a chung hi Lungphek hlai taka khuh a ni a, 1955-ah Tuna a lan ang hian siam a ni ta a ni. Ka la naupang viau a, mahse ka hre chiang ve thei tawh hle a. A chung an zut lai hian cement ro tak tak hmain Kawiin kan nawt mam ve thin.

Chhawrtui Tuikhur chunglamah hian tlang sang tak a awm a, chu chu Chhawrtui khaw chhunga tlang sang ber lai a ni a. A chhipah hian Bung a awm avangin Bungtlang an ti a. Indopui lai khan Champhaia Ration thlak tur Thlawhna pakhat chuan Chhawrtui khuaah hian a thlak chiam mai a. Inte a deng chhia a. A hnuah engvanga chulaia thlak mai nge tih an han zawh chuan 'Bung awmnaah thlak tur in tia lawm' a ti e, an tih chu. Champhaiah Bung a awm a, Chhawrtuiah pawh a awm a. A hnai zawk leh Japan ral hlat deuh zawk Chhawrtui khua Bungtlanga Bung a hmuh hian a thlak ta mai a ni awm e. Chuta tanga rei vak lovah chuan Chhawrtui Bung chu Tekin a deng a, a thi ta a ni.

Bung tlangah chuan Chhandamna Sipai Pawlin Biak In an nei thin a. Tunah erawh chuan a hmun an sawn tawh a. Mahse Chu Biak Ina Zahngaihna Dawhkan chu Ka piantharna hmun leh Rawngbawl tura ka inhlanna a nih avangin ka ngaisang a. Chumi hmunah chuan Chhawrtui khuain Zahngaihna Dawhkan Cement-in min siamsak a, ka kal apiangin ka inhlan thar thin. He Zahngaihna Dawhkanah hian: 'SIM RAWH U VANRAM CHU A HNAI TAWH E' tih a in ziak.
Chhawrtui khua miten an hriat larna dangdai tak dang pakhat chu: 'Hming Mak' a ni. Chung hming mak an tih thinte chu: Aiuta, Awtliana, Bawngauva, Bawngsaia, Buhsanga, Chhesawnga, Hmaihlaia, Hnamlena, Keseia, Mawiuka, Rangliana, Rawkhawnga, Sakeia, Savawma, Sapbekhama, Telrawka, Tesawpa,Vaiseia, Vaisanga. - Heng hian hming hran tha pangngai deuh chu an nei ve tho a ni awm e. mahse Chhawrtui khawho hi an phawk khawpa hming loa in kohte hi an ching a, mahse tuman an ngaihaw chuang lo. ~A thente hi chu an hming tak tak a ni.

Chhawrtui khuaa hming sei ber nia an sawi thin chu: Paihtevengkawntlangliamapusiamdalasakhithangkamnabulabatlingkungathangnangkhawngaempaikhataphurthurthuri hming hi a ni. Mihring hming chu ziahzawm vek tur tih hi Primary School ka kal laia min zirtir dan a nih avangin ka ziak zawm a ni. Chhiar la, chhiar awl tura i ngaih angin han ziak chhuak chhin teh le!!!