17 October 2008 khan kan nupain kum tam tak kal ta atanga fiah leh hriat chian ka chak em em, Ebal tlang leh Gerizim tlang in kar ruam mel hnih laia zau Pathianin 'Natural amphitheatre' atana a lo siam hi kan finfiah thei ta. Israel fate Aigupta atanga Mosia hruaia an chhuah khan Jordan rala an la awm laiin Mosian Joshua hnenah helai ruam chanchin leh a awmna laite chiang takin a hrilh a. Chumi ruamah chuan Israel fate zawng zawng hruai khawm a, Pathian thu pek an zawm chuan malsawmna an zawm loh chuan anchhe dawnna ni tur chu chhiar chhuak turin a hrilh a. Israel hnam 12 te chu hnam ruk ve ve a then a, Ebal tlang leh Gerizim tlangah chuan dah turin a ti a. Ebal tlang lama mite chuan anchhia an entir ang a, Gerizim tlang a mite chuan malsawmna an entir ang. Mosia hrilh ang tak hian Joshua chuan a ti ta ngei a (Joshua 8: 30 - 35). Ka zawhna chu 'Engtinnge aurinna hmanrua engmah la nei si lo khan Ebal tlang leh Gerizim tlang mel hnih laia zaua mipui sang tamtak tling khawm khan an vaia Amen rual thei tura Puithiam aw kha an hriat vek theih? tih hi a ni.
Gerizim tlang chhipah kan han chuang chhuak a, kan hnuaia khawpui pawimawh tak mai Shechem (tuna Nablus an tih) chu kan zuk thlir a, a hlat teh reng nen an thawm a ring em em mai a. E khai, a chanchin kan lo hriat hi a dik theih ngei dawn hi kan ti dun a. Chuta tanga kan chhuk hnu chuan Gerizim tlanga Samaritan khuaah chuan Samaritan Museum kan en a. Chuta an Director Mr Husney W. Kohen chu kan kawm a. Kan zawhnate chu kan han zawt a. A lo phur hle mai a, 'Vawiin ni thleng hian Ebal tlanga mi leh Gerizim tlanga mi pawh hi a la in biaktheih a lawm, Pathianin helai ruam hi danglam takin a ruahman a ni' a ti a. Chu chauh ni lovin Ebal tlang chu anchhe entirna a nih angin engmah a tha thei lova, Gerizim tlangah erawh chuan hei in hmuh angin khaw nuam tak a awm a, thlaite pawh an tha a ni' a ti. Gerizim tlang bakah Samaritan mi ngei hmu a, chibai a, thlate kan han lakpui ta mai te chu lawmawm kan tiin, Pathian min hruai dan ropui kan ti hle. Mr Husney chuan Samari mite chu mi 750 chauh an ni tih min hrilh bawk.
Gerizim tlang leh Ebal tlang inkara Shechem khua chu Abrahama Puan In kaihna, Israel faten Aigupta atanga an chhawm chhoh Josepha ruhro an phumna, Jeroboama Juda lalte atanga a intih hran a Khawpui atana a hman a ni a. Samari hmeichhia leh Isua Jakoba tuichhunchhuaha an inbiakna leh Israel history a thil pawimawh chi hranghrang thlenna a nih avangin phur em emin tlawh turin Gerizim atang chuan kan tlan liam thla ta a. Vanduaithlak takin Palestine khawpui buaiber lai a lo ni tlat mai a, luh min phalsak ta si lova, lungchhe em emin Jerusalem lam kan pan leh ta a ni. (Heng thu hi chiang zawkin kan zinna chanchin a bua kan ziak mekah tihlan a ni e)
.JPG){kind=link}
7 comments:
A ngaihnawm e,in zinna chanchin kan lo thlir thin a, kan lo mitthla ve ruau ruauva awmhmun atangin, kan lung a lo leng ve em em thin a ni. "Aw Jerusalem, ka theihnghilh che chuan..."han tih ve maite a chakawm rum rum thei alawm le
A ngaihnawm ka ti hle mai. Sound system chungchang pawh a chiang ta deuh e.
Galilee tui chunga kal ve mawlh hi ka chak.
Gerizim tlang tih hian ka lung a len riau mai bawk. Hemi chungchang Chaltlang kan awm laia i sawi kha ka la mang hriat riai ruai a, tunah hian ka fiah ta sawt.
Blog post ho hi lo compile ila, Beiseina Nung pre-release lo nei vel ilah..
A bu chhuah hma hian Dini te hian min lo release khalh mai ang tihte pawh ka hlau ta deuh e a, mahse ka awn chhuah chhunzawm zel tho ang. Tlem tlemin, a hmahruai a ni mai alawm.
Bible atang leh hrilhfiahtute hrilhfiahna chhiar atanga suangtuahna rama fan thin kha mahni mit ngeiin in hmu a, a leilungah ke in zu nghat ta a nia! Ziak lo chhiar aimahin hmaichhana in titi ngaihthlak a chakawm.
Camel chungah hian ka chuang chak kher mai, nuam dawn e, kan kang vah mai dawn ania.. Ooty-ah pawh khan Sakawr lian tawk chungah ka chuang a, boruak hip a sang khawp mai..
@ Dini, A hmunah Camel hi hmu la chu i hlau vang, a lian turu lutuk, han chuang mai la chu i sang ngawt ang le!!
Post a Comment