Birth Day

Pu Lallura Sailo chuan "Ka nu ka birth day hi eng ni nge? ka ti a. Ka nu chuan 'I nausen lai khan i pa khan Shillong atangin min rawn hruai a, kan chhuk thlak khan Shillong tlangah Khasihovin leipui an lo hal let let a' a ti ringawt mai a. Chuta tang chuan ka rin dah ta mai a ni". a ti. A pa hi sipai Jemadar Empera Sailo a ni a. A lan dan chuan thil chhinchhiah na chang hre awm tak a nih teh lul nen. A lo chhin chhiah hauh lo.

Hengte ka ngaihtuah chang hian ka nu, min hmangaih a, ka piantirh atanga ka nun engkim mai min hriatsak a, vawiin ni thlenga min tawngtaisaktu ka nei hi ka vanneihzia ka hre chhuak thin. Ka piannite hi min lo chhinchhiahsak tha em em mai . Lehkhabu te takte a siam a. A kawm chhung lamah chuan ka nausen lai thlalak tarin 'Lalkiamlova, Pianni March ni 7, tlai dar 3:20 tih hi a in ziak kalh a. A phek dawt lehah chuan A chhartu Nurse Laii leh Biaki, pianna hmun Aizawl Civil Hospital a in ti bawk a. Chuta tang chuan ka nuna thil thleng danglam deuh a piang a chhin chhiah ta zel a. Ka bawrh chhuah ni leh chumi avanga ka khua a sik thute. Ka bawhkhup theih ni te, ka thut theih ni te, kawng ka vuana ka din theih ni te, Bawng koh ka thiam ni te, Ka din theih leh kal ka tum a, ka ke hnuai pan avanga ka thulh leh rih thute lamin min chhinchhiahsak vek a ni. A tawpbera a chhinchhiah chu kalchhet chuan ka thiam ni a ni a. Chung nite chu keimah pawhin ka hre chiang tawh khawp mai. Khang lai khan chuti takin ka nun min care a ni tih ka hre hauh lo. Mahse tun hnua ka ngaihtuah let hian ropui ka tiin ka lawm tak zet a. Ka pian cham kum sawmrukna a lo thlen hian Ka Nu hnena ka lawmthu sawi nan hei hi ka ziak a ni.

Pathian huat zawng leh a duh loh zawng ka tih pawha vuak fung nen min zilh lova, Zahngaihna Dawhkan min kawhhmuhtu a nihnate hi ka ngaisang a. Ka nau Nghaktei nen min indanpui a, kei tleirawl ve uaih tawh chu miten lehkha zir chawla amah hna thawhpuia ram tang mai tura min ngaih laia Lehkha min zirtir tang tangtu a ni a. Ramhnuaia ka kal ve lai pawhin huaisen takin hotute hnenah 'ka fapa neih chhun a ni a, inkahnaah teltir lovin Office lamah dah hram tehu' titu kha. Ramhnuai pukah ka damlo min rawn tlawh a, ka silai phura min hruai hawa min enkawltu kha. Lalpa rawngbawl tura min hlantu, hun harsa tawp khawk a tawh pawha min la let lova, kal zel tura min fuihtu kha. A In vawihnih an halsak a, a tawpah hlate khuaah a silh leh fen lai chauh changa an hruai khawm hnu pawh a, min laklet zai rel lova, mahnia su tlang zeltu. A lakah ka va ba hnem em.

Nikum hmasa khan Aizawl Bethlehemah Nute ni kan hmang ve hlauh mai a, chumi ni chuan Lawmthu sawina pangpar mawi tak ka hlan a. Ka kum 60 Birth day a lo thlen hian chumi tuma kan thlalak hi kan tar chhuak teh ang. Ka nu avang hian ka Birth Day hi a special em em a ni.

Ka Nu ka lawm e.

Ka nupui fanaute hnenah pawh lawmthu ka sawi. Ka nupui duh tak Commissioner Lalhlimpuii hian ka birthday hi a theihnghilh ngai lo chauh nilovin min lawmsak ziah a. Hun tak takah then leh rualte min khawmsak thin a ni. kan fate nise ram hla taka kan awm pawhin a huhovin Telephone-ah min rawn wish thin a. ka tan ka nupui fanaute hi malsawmna an ni tak zet a ni.

A tawp leh a bulpuiberah chuan Kum 60 lai khawvel min hmantir a, ka hun zawng zawngah min thlahthlam lova min venga min hruaitu pathian hnenah lawmthu awm rawh se.

Friday, February 20, 2009

THLAMUANTU AN MAMAWH:

Orissa tih hrim hrim pawh hi Kristiante tan hming raptlak tak a ni ang tih ava hlauhawm em!! Kum tamtak kaltaah khan Phulbani District tuna Kandhamal an tih takah hian kristiante tihduhdahna a thleng tawh a. Chumi tum chuan mihring khawih lovin an Biak Inte tihchhiatsak an ni a. 1999 January ni 23-ah khan Dr Graham Staines leh a fapate pahnih Phillip-a leh Timothy-a te chu an Motor chhunga an mu lai hal hlum an ni leh a. 2008-a Kandhamal District chhunga Kristian zawng zawngte chu an theih theih thatin an pawngsual bawk a. Biak In chauh ni lovin Mi mal Inte pawh tih chhiat vek a ni a. Fahrah chawmnana In pawh an zuah chuang lo.
Kandhamal District chhunga tribal hote hi hman lai chuan mihringa inthawi thin an ni a. An eizawnnaber chu Tengtere hi a ni a. An Tengtere te an rah that theih nan mihringin an inthawi thin a ni. Chu chauh a ni lova, helai biala Pan an tih hnamhote hi Bristish hun lai khan Criminal tribe an tihte zinga hnam chi khat an ni a. Mi pangngai an nih theih nan Salvation Army-in theihtawp chhuahin an lo enkawl tawh thin a. Puan tah te, Capenter hnate leh thil chi hrang hrang an eizawnna tur atan an lo zirtir tawh thin a ni. Chunglaia an enkawl dan chu Log house an tih mai Thing hlira sak In chhungah tlaitin mipa kum 14 atanga kum 60 thleng chu an khung khawm ziah a. A tukah hna thawk turin an chhuahtir a, tlaiah Roll call an nei leh a. Kim lo an awm phawt chuan Policein an umzui nghal vat thin.
Nikumah kristiante tihduhdahna a lo thlen khan Kristian tamtak chu ramhnuaiah an tlanbova, chuta tang chuan thenkhat chu mel 200 chuangte kea kalin hmun him an thleng a. A tam zawk tlan chhe ve thei lote chu sorkarin la khawmin Camp parukah mi 55,000 vel zet chu an khung khawm a. Chung chu Sorkarin an chawm ta a. Camp atang pawh hian mi thenkhat chhungte leh hmun him pana an chhuah nual avangin an number a tlahniam zel a. Tunah chuan camp pawh pathum chauh siam a ni ta. Heng campa awmte enkawlzui zel dan tur hi engmah a la chiang thei lo. Camp pathum zinga pakhat Tikavalli an tihah chuan 500 an la awm a, chung zinga 150 chu salvation army an ni.
Heng campa la awmte hian thlamuantu an mamawh hle mai. January thla tawp lam khan Mizoram Kristian hruaituten an pawisa khawnkhawmsak Maktaduai chuang lai kengin an zuk tlawh chhuak a. an zingah hian major Lianhlira Salvation Army social Secretary pawh a tel nghe nghe a ni.
Heng kan mite tlawha thlamuan tur hian February ni 10 khan Bubhaneswar atangin kan chhuak a. Territorial Commander, Divisional Commander leh Officer dang pathumin min zui a. Cara Darkar 6 chuang kan tlan hnuah Tikavalli camp chu kan han thleng a. Permit lakna tur hotu tumah an lo awm loh avangin Gate-a Sipai dutyte dilin kan mite leh hruaitu thenkhatte kan ko chhuak a, Gate pawnah kan in chibaiin mittui tla zawih zawhin kan in pawm a. A lungchhiat thlak duh hle mai. Tawngtaihonate neiin engemaw chen kan titihova. An pocket money tur tlem azawngte kan pek fel hnuah kan tinsan leh ta a ni. Orissa state chhunga salvation Army Officer awm zawng zawngte chu ko khawmin an DHQ hmun Angul-ah ni 11 February-ah Inkhawm ka neihpui a. Thlamuanna thute sawiin hun tha tak kan hmangho. A tuk Ni 12 chuan Bubhaneswarah Kandhamal District atanga tlan chhe chhuak Salvation army mi leh sa Chhungkaw 34 te nen Inkhawmna hun tha tak kan hmang leh a. Tuman chibai mai an duh tawk lo, mittui tla chungin min pawm vawng vawng mai a, insum a har khawp mai. Thlamuantu an mamawh a ni. Anmahni thlamuanna thute sawia tawngtaisakin kan tinsan leh ta a.
Anmahni chhawmdawlna tur ruahman turin a bialtu Territoryte ngen leh hriattir an ni a. Reiloteah ruahmanna fel tak an rawn thawn theih thuai ka beisei.