Wednesday, February 24, 2010

ZAHNGAIHNA DAWHKAN LEH KEI (MERCY SEAT AND ME)


Lalpan Mosia hnenah Zahngaihna Dawhkan (Mercy Seat) siam turin a hrilh a. Chutah chuan a rawn bia in a mite a rawn tawk thin dawn a ni tih a hrilh bawk a. A dung leh a vang (a size) leh a chungah Cherub in thla an zar tur a ni tihte lamin a hrilh vek a ni.
Ka naupan lai Chhawrtuia kan awm lai chuan Nilaithawhtan zan hi Naupang Inkhawm a ni thin a. Zankhat chu kan Officer (Captain Saidawla) in Naupang sipai a lut tura min buatsaih laiin thutiam min zirtir a. Chu thutiam chu:

"Ka sual kalsanin tunah Lalpa Isua Krista chu ka chhandamtu atan ka pawm ta. Ama tanpuinain a fa hmangaih leh thu awih ka ni ang a. A sipai rinawm ka ni bawk ang. Mi dangte pawh chutiang nihtir turin ka bei ang. Tawngtai turin, Pathian Lehkhabu chhiar turin leh Ruih theih lam thil reng reng ti lo turin ka tiam e." tih hi a ni a.
Chumi zan chuan Zahngaihna Dawhkanah thingthiin Lal Isua Krista chu ka chhandamtu atana pawmin ka inhlan a. Chumi hnu kum engemaw zat hnuah kan lo tleirawl a, Pathian leh hotute duh loh zawng thil kan lo tipalh a, ka Nu-in Zahngaihna Dawhkanah Ngaihdam dila kun turin min tir a. Ka kunin Pathian ngaihdamna ka dil a, min ngaidam ngei a ni tih pawh ka hria a.

Hun a lo kal zel a, Lalpan Rawngbawl turin min ko ta a, chu chu 1967-ah a ni a. Salvation Army House to House Campaign group a ka tel venaah a ni nghe nghe a. Zan a rei tawh hle mai a. Zanlai a ni tawh a. Chumi zan la la chuan Zahngaihna Dawhkanah kuna Pathian biak tulin ka hria a. Kan Biak In kan khuaa tlangsang ber Bungtlanga awmah chuan han kalin Zahngaihna Dawhkanah chuan " Lalpa, Aw le" ka han ti ta a ni.

Kum engemaw chen rawngbawla kan awm ve hnuah kan Biak In chu a hmun ngai atanga sawn a lo ni ta a. A hmun hluiah chuan Chhawrtui Water Supply Tuizem lianpui pui mai dah a ni a. Chumi sirah chuan ka inhlanna hmun a ni tih hriat reng nan Chhawrtui khuain Zahngaihna Dawhkan Cement in min siamsak a. Kan Zahngaihna Dawhkana in ziak ngai te bawk 'Sim rawh u Vanram a hnai tawh e' tih an ziak a. Chu chu ka Bethel hmun pawimawh tak a lo ni ta a ni. Chhawrtui ka kal apianga ka tih hmasakber chu, Chumi hmuna han kala Lalpa pawlna han neih chu a ni. Zahngaihna Dawhkan hi a hlu a ni, i ngaipawimawh ang u, Chutah chuan Lalpan a mite a tawk thin si a.

Saturday, February 13, 2010

MIHRINGA NUNNA THAW HI LALPA TA A NI

Kan chenna khawvel, Pathianin a mite an hring chan chhunga an chenna tura a siam hi eng a ti zo ta nge ni ngai ang le!! Engatinge mihringte hi heti em em a nun ning ang maia kan tal tak? Engatinge Lalpan mihringa a dah Ama thaw ( A Nunna) min hawhtir hi zah lova mihring nunna, mahni nupui fanau te leh mahni fate ngei ngei nunna pawh lak kan hnial loh tak mai hi ni le. Thenkhatten mahni nunna thleng pawhin an la duh bawk a.
Heng a hnuaia Chanchinbu thlalakte hi London chanchinbu Metro 12. 02. 2010 a chhuak a mi vek an nih hi. Tuk khat chanchinbu chhuakah pawh heti zat, inthah, mahni intihhlum a awm chuan khawvel nitin thil thleng hi la khawm ila ava rapthlak zual dawn em!!! Mihringa Nuna thaw awm hi kan ta a ni lova, kan duh hun huna kan tihtawp leh sawisak atana min pek a ni lo. Lalpa ta Aman tha a tih huna a laklet tur a min pek a ni. Heng Bible chang Joba bu a mite hi en ila: 'Keimahah hian ka thaw a la kim a, Ka hnarah Pathian thaw a la cham' (Joba 27: 3). Pathian Thlarau chuan mi siam a, Engkimtitheia thaw chuan nunna mi pe' (Joba 33: 4). 'Ama thlarau chu a hnena a lakkir a, Ama thaw chu a hnena a lakkhawm leh chuan, Mi nung zawng zawng an boral rual ang a, Mihring chu vaivutah a chang leh mai ang. ( Joba 34: 14, 15).
Khawvelah hian kan hrehawmna leh tuarnate leh thawippikna avang te a intihhlum tur ni ta ila, Joba tluka thih chak tur leh mahni intihlum duh tur hi an awm chuang lo. Mahse Joba chu a nupuiin intihlum mai tura a rawn pawhin "Nang hi hmeichhe a tawngin i tawng a nih hi. Eng nge, Pathian hnen ata thil tha kan hmu a, thil tha lo pawh kan hmu lovang em ni?" a ti tlat mai a ni (Joba 1: 10).
Khawvel hi a hrehawm ngei a, a ninawma, a thaw ippik thlak teh zawng a nih hi. Hebrai mite hnena Lehkhathawn ziaktu chuan: "Chung mite (Pathian mite) tan chuan khawvel hi awmna tlak a ni lo, thlalerah te, tlangah te, pukah te, khuarkhurumah te an vak an vak thin a" a ti (Hebrai 11: 38). Mahse chung tihduhdah tuartute chuan 'a hrehawm em mai thi ila a nuam zawk ang' tiin tuman anmahni nunna an titawi lo. Lalpa an nghak zawk thin.
Kan hrehawmnaah pawh lawmin awm ila, chhel takin i tuar hram hram ang u. Lalpan min awmchilh a, a mite a thlahthlam ngai lo. Rinawm taka hrehawm a tuar chhuah hnuah Joba chu Nun hlimawm tak pek a ni.
(A chung: He Driver hian a partner hlui nen an inhnial thinrim vang ringawtin a fate pahnih Motorah khung in Vur luiah a tlan luhpui a nih chu)
(A chung: He pa hian a nupui leh a fanu a that a, amah a inawkhlum bawk nia hriat a ni)
(A chung: He nu hian a ngaihzawng hlui nupui nei tur thikin an pahnihin turin a hrai a, a mipa chu a thi)
(A chung: He nula hian a bialpa hlui a then tawh chu ngaiin kohkir leh nan tiin Damdawi a ei a, a harh chhuak zo ta lo).
Aw khawvel, khawvel, mihringte hnena lawmna leh hlimna i hlan ve theih chhun te hi Pathian tel lova hman chuan lungngaihna leh thihna thlentu mai an ni e. Keini zawngin Lalpa kan nghak tlat ang a, i chhunga kan chen a phal chhung zawng min tihrehawmtu setana hi kan do vanga; Lalpa hmingin hnehna kan la chang ngei dawn. I chhunga kan harsatna leh kan tuarna mit tui zawng zawngte hi min la hrukhul sak ang a; buaina chungah zalen takin min la lentir ang. Lalpa chauh kan fak zel dawn!!! Amah fak mai loh chu hlimna dang a awm si lova.