CHHAWRTUI KHUA

Khawhar lunglen zual ni deuhte hi a awm thin a, chutiang hunah chuan mahni seilenna hmun hlui lamah rauthla a leng thin. Ka naupan atanga kum 1968 March thlatir thlenga ka chet tlatna ram leh mual leh thian hlui te rilruah an lang uar uar mai. Ngai viauin sulhnu chhuiten han kalin han fang vel mah ila a hmunah pawh hmanlai kha an la ngaihawm tho va, engmahin a hnem tak tak thei tawh love. A hmunah pawh lunglen a zual ting mai a ni.

Chhawrtui khua hi Champhai Road a Kawlkulh khua atang khian chhim lamah Mel kua a ni a. A in karah Puilo khua, chhawrtui atanga mel ruk, Kawlkulh atanga mel thum a awm a. Chhim lamah Vanchengpui Mel sarih ah a awm a. Khawthlang lamah chuan Tuivawl ral Mel sarih a hlaah Tawitlang panga Maite khua a awm bawk a. Chhak lamah chuan Arro khua Tuichang ralah Mel sarih a hla bawk a awm.

Ka hriat theih tirh atangin YMA a ding tha hle a. Sum tuakna dang teh vak awm loh vang nge an fin vang hrim hrim Sipai Chhuti lo hawng hi an lawm ziah a; pawisa chung lai hun atan chuan tih tham ve tak kha an thawh zel bawk a. Sum tuakna tha tak a ni. Kan YMA president kumhlun chu Kangliana a ni a. Kolasib-ah nikum hmasa lam khan van kohna min chhansan ta nghe nghe a. Thalaiin kan zah em em a, thlan mualah thlan laihnaahte hian a lo kal tawh chuan tumah thu ngam kan awm lova. Lo thu mai mai pawh hi kan tho sung sung mai a, thlan chhunga luh kan in chuh sup sup mai thin a ni.

YMA bakah 'Tlangval Tang rual pawl' an awm a. Khamite kha an fakawm ka tiin an hna thawh kha a hun lai atan chuan a tha thlawt a ni. Mitthi lumen tur an awm apiangin zanlaiah Mizo chhangban kan leh Kurtai leh thingpui an sem ziah a. Khawhar chhungte leh tlaivar riltam te tan hlu tak a ni. Chumi ti thei tur chuan Buhban hmunte an nei a, vawkte an ser a, a hriak an dah tha a. Lumen ngaia thi an awm tih an hriat veleh an tlan khawma chhang an chiah a, an deng nghal a, Nula a dihsaktu an nei nge ni ka hre lo. An pawl hming chu 'Tlangval Tang rual Pawl' a ni si. An lo thawkrim awm hlein ka hre thin. Ka hriat dan chuan U Savawma te in kha an Headquarters a ni a.

Lo nei mite infuihna atan Buh za lawm kan nei thin bawk a. awm ni khamin Mual zawlah intihhlimna chi hrang hrang siamin Buh za chung lam nei zawng zawngte hnenah chawimawina an hlan thin a. An chawimawhna pek erawh chu Ser tawk te leh Serthlum te in awrhtir kha a ni mai a. Mahse chawimawina a nih avangin a hun lai kha chuan Lo nei mite fuih nan a tha em em a ni.

A khaw hmun chu a thlalaka a lan ang hian a bumbohvin a awih ve khawp mai a. Mahse a mi chengte chu fiamthu duh tak tak hlir an ni a, an fiamthu a sang a mahse tuman huat en enah an en lo. Mikhual tlangvalin nuam an ti thei hle, a chhan chu khawtlang tlangvalin an nulate lakah an thik ve ngai loh vang a ni. Rilru zau leh inpawh tak, chhungkua ang maia In zahnih dawn lai khua kan awm khawmna leh hun lai kha a ngaihawm thin teh e.

Halpuah tel lo Christmas leh Kumthar lawmna

(Vaiva kawn field leh a chheh vel, Chief Minister tual atanga lak)
Thianpa Fela zarah zoram lam chanchin up-to-date tak tak kan lo hre ve zel a. Kum 2009 Christmas leh Kumhlui thlahna leh a thar lawmna te pawh a ni ang chu, Halpuah telovin zoramin an hmang a ni tih hriat hian thil tam tak min ngaihtuahtir.

Pakhatnaah chuan tun tum kan sorkarin hma an la chak tawkin, a thawktute pawhin sorkar thupek an kengkawh tha a ni tih a lang. Kum dangah kha chuan 'a khaptuten an man khawmsa an fate tan an hawn a, an hal tho' tihte kha a ri nasa hle thin a. Tichuan Christmas-ah a reh ve deuh pawhin Kumhlui thlahna leh a thar lawmnaah chuan Zanlai Inkhawm pawh tih mumal hleih theih loh khawpin a bengchheng mai thin kha a ni a. Kumin chuan Zanlai inkhawm pawh a hun takah tibuaitu bengchheng awm lova hman a ni chu a lawmawm hle mai.
Pahnihnaah chuan Zoram mipuite hian zirtirtu leh hruaitu tha kan neih chuan thu kan la awih a ni tih a tilang. Zirtir theih kaihhruai theih kan la ni a, chhan tlak kan la awm a ni. Kan sorkarten thil tha tam zawk min zirtirin min hruai zel se, hmasawnna kawngah chak takin kan kal theih a rinawm.
Tunah chuan Insak dan hmangte pawh Dan mumal tak siamin kalpui a lo ni ta a. Hetih rual hian zoram hriselna atana pawimawh em em chenna inte pawh hi thlir tel ni se a tha ngawt ang. A bikin Mi luah tura insak leh kan in inluahtirte hi Sorkarin Dan hmangin khuahkhirh sela ka ti hle mai. Tuna Kan In inluahtir tamtak hi chu mihring khawsakna tur awma ngaih a ni lo. Choka, Bed room, sitting room, mumal engmah a awm lova. Ek In leh tuikhawihna hmun mumal a awm lova, heng hian zoram hriselna nasa takin a tichhia a. Kan rilru leh ngaihtuahna pawh a tihniam a ni. 'Mi luah tura in sak chuan Choka, Dining room, Bed room, living room leh Ek In tha tawk a nei ngei tur a ni a. Sorkarin approval a pek loh chu tumah luahtir theih a ni lo' tiin Dan han siam hmak mai sela, kan khawsakna chu a thangawkin ka ring a ni.
Mizote hi kan tlem a, India ram state-ah mihring thawlber dawttu kan ni a. Kan in luah dan hmang te, Dawr luah dan hmangte hi Dan mumal awmin, changkang zawka siam chu nise India ramah hian state dangte tan kawng hrang hrangah entawn, zirtirtu ni thei turin kan ding chhuak thei. Vai rama mihring bit lutuk tihngaihna awm tawh lo rama an awm dan entawn lovin, kan bul hnai, hnam tawp tak nia kan ralrin ringawt Bawteho kan tih Bhutan te hi i thlir teh ang u. India ram nen a inrina atangin a danglam nghal a, an khawlai a fai thianghlim em em a, an in leh lo sak hmang a fel fai a, entawn tlak an ni. Ram thianghlim Sap ram leh Japan ram chanchin te hahipin kan sawi a. Chung chu kan ramah hian kan ti ve thei, kan sorkar chaktak hian hma han la sela mipui ten lawm takin i zawm teh ang u, keimahni hriselna tur, mawina tur leh hamthatna tur vek a ni si a.
Kum thar 2010 kan chuankai hian kan ram hmangaih em em Zoram hian hetiang hawi hian ke pen se ka va ti em!!!!