KA CHHINGMIT KHARLAI MIN HAWNSAK VE ANG

Kum 1975 kum khan Mizoram Sorkar leh Salvation Army in be remin Kolasibah Mitdel School hawng tura hmalak a ni a. June thlaah kan hotuten Kalimpong Mitdel Schoolah Mitdel hawrawp zir turin min tir a. Dhalchera Corps-ah Commanding Officer kan nih lai a ni a. Kan fa upaber Janet Lalmawipuii chu thlaruk mi chauh a ni a, Kalimpong-ah chuan keimah chauhvin ka liam thla a. Mitdel zirlai leh zirtirtuten an hawrawp leh anmahni enkawl dan, kaih dan thlengin min zirtir a. Kum a lo ral a, December a lo nih meuh chuan, kut kherin chhiar ve thei lo mah ila, ka thiam thaw khat ve ta viau mai. Janaury thla lamah chuan Mitdel School thar hawng mai tura in ngai kha a In sak a la inpeih loh avangin Mary Scot Home ah chuan Assistant in Brigadier Dorothy Page-i hnuaiah appoint kan ni ta a. Ka nupui leh kan fanu Janet Lalmawipuii kum khat lo ni ve chiah chu ka han hruai a. 1976 kum chu School-ah zirtir pahin Mizoram Primary School zirlaibu Mitdel hawrawpa lehlin nan kan hmang ta a ni.
Kum 1977 January-ah Zoramah chuang chhuakin Kolasib-ah School chu kan han hawng tan ta a. Official-a hawnna erawh chu 17 April 1977-ah Territorial Commander Colonel Jaikumar Makanji an a nei. Hemi ni hian khua a chhe hle chungin Sorkar hna thawk mi lian engemaw zatin Aizawl atangin min tawimawm.

Mizote hian kan fate rual ban lo apiang hi kan lainat a zual a. Mitdelte zirna schoola tirh pawh kan harsat khawp mai. Anmahni tana rilru nawm vena tur lam kan ngaihtuahpui thiam loh vang a ni bawk a. An hmangaihna leh lainatna ngawt thlirin nu tam takten 'a ni mit khaw hmu lo thawh chhuah ka it lo' tiin lehkha zir tura tirh an remti lova. Chungte hrilh fiah nan leh Mizo mipui hrim hrimin Mitdelten lehkha an zir thei a, hna an thawkin mahni an into delh thei a; Nu leh pa leh chhungte chawmtu an ni thei tih an hriat nan Campaign neiin kan chhuahpui reng bawk a. Kum 1977 kum chuan campaign-in kan zin chhuak nasa hle a ni.
Tum khat chu Bilkhawthlirah Pathianni hmangin kan kal a. Kan haw lam chu zing karah Pu Lalhmingthanga Ralte Junior Engineer PWD in a Mortorin min han thlah a. Bilkhawthlir kan pelh phat atangin kan zai tan a, engemaw chen kan tlan hnu chuan hla pakhat a phuahtu ka hre lo:
'Lei hring nun hi ka pelh hun chuan,
Lungngaih tahna a bo vang;
Tlansate nen hlim tawp lovin,
Chhandamtu kan fak ning lawng'
tih hi thiam em em mai hian kan naute chuan an sa a. An sak lai chuan ka hnuk a ulh ta tlat mai a. Lei hring nun pela Lungngaih tahna bo hun tur an tana a nghahhlelhawm bikziate ka ngaih tuah a; zaipui thei lo khawpin ka tap ta mai a nih chu!! Chu chuan hla thar min rawn pe a. In kan thlen veleh Pen ka la a. Ka ziak nghal ta a.

He lei hring nun buaina ramah,
Ka chan tawk khuarel ka han dawn thin a;
Thimna leh thawpikna chauh maw,
Ka chan tawk reng hi lo ni le, Lalpa.
Hring mi naufa zaleng zawngten,
I kut chhuak ropui hmuin an chhiar;
Mahse ka nunnaah kei zawng,
Thimna lalin ro a rel e, Lalpa.

Ka chun leh zua unau zawngten,
Tinkim dawna nun khua an rel changin;
An lungawi lo an hrai duh leng,
Khawvel par mawi tawng lova ka leng hi.
Mahse min hmangaihtu Kristan,
Pathian ropuina tur a lo ti;
Amah fakin ka zai ang a,
Ka nih dan zawng i tan ka hlan Lalpa.

Ka thimna ram he thlaler hi ,
Ka pelh hun chuan hmangaih Lalpa ramah;
Nunna tharin lungduhte nen,
Hmangaihtu hmel kan la hmu ve ngei ang.
Tah chuan min hmangaihtu Kristan,
Nunna thar min lo pe dawn si a;
A kut chhuak ropui chhiar turin,
Ka chhingmit khar lai min hawnsak ve ang.

Ka nupui Lieutenant Lalhlimpuiin a thluk min siampui a, rei loteah sak theihin kan peih ta mai a. Ka phuah han tih chi pawh ni vakin ka hre lo. Lalpan min rawn pek liau liau ni berin ka hria. Chu hla thar nen chuan Zoram dung leh vang kan fang a, kalna apiangah mi rilru a hneh viau zel a. Kan nauten an hawrawp an chhiar a, Mitdel Sana pakhat kan neih chu mipui hmaah kan entir zel bawk a. Zoram mipui pawhin Mitdelte tan lehkha zir theih a nih leh kut dawha kawng sira thu mai lova mahni kut hna thawh chhuah ngeia din theih a nihzia kan hre chiang ta in ka hria.

Kum 1977 a lo tawp a, 3 Decembera Advance Christmas kan hmanni te kha a ngaihawm ta hle mai. Kolasib khaw chhunga sipai leh thian tha engemaw zatin min rawn hmanpui a, kan hlim teh asin!! Tunah chuan khang hun laia kan naupangte engemaw zat Matriculation pass leh graduate hialte niin sawm chuang laiin sawrkar hna an thawk ta mai hi lawmawm ka va ti tak em!! Hman kum deuh tawh atanga Aizawl khawpui kawtthlera Mitdel zaia kutdawhte ka hmuh hian ka rilru a na hle thin. Engemaw zat hi kan School naupang thin in zir chhuak zo ta lote an ni a. Hengmite tan hian eizawnna tur kawng dang zir tur a awm ngei ka ring thin. Hetia kutdawha mi thatnaa innghata awm ringawt lova an awm dan tur hi ngaihtuahpui tha ka ti khawp mai. Hetia kut dawha an zai hian mi rethei leh harsa dangte tan hna thawk hram lova kutdawha thut hi ei hmuhna awlsama ngaihna a hrin theih avangin sorkar pawh hian ngaihtuah deuh se tha ka ti hle. Kolasib Mitdel School Lalpan malsawmin hruai zel rawh se.

Lt, Colonel JOAN WILLIAM - MISSIONARY

Lt, Colonel Joan William-i hi India rama thawk tawh Missionary te zingah kan hriat lar ber a ni hial awm e. A pasal nen Missionary in Burma, India leh Sri Lanka-ah te an thawk tawh a. Sri Lanka-a an thawh laiin a pasal in Vankohna a chhansan a. Chumi hnuah India ram Kolkatta-ah Office neiin India pum Social Service Secretary in a awm a. Chuta tang chuan a retire ta a ni. India rama thawk tawh Missionary te zinga India ram hmangaiha, vei zung rengte zinga pakhat a ni a. Tunlaiah phei chuan ani lo hi chu thahnemngaia sum leh thahrui thawha an hmangaihna lanzui tirtu kan nei lo ni hialin a lang.
Tavistock, Devon-ah a awm a, A In pawh a kawt lam chu Market an a ni a, a kawm thlang lamah Lui lian ve tak hi a tlawh chhan bawk a. A hnuaia thlalak hi a kawm thlang lam pang Lui luang langa kan lakho a ni. Kan nupa bakah Mamuani (Rev. Lawmsanga nupui) leh a fanu kan hruai bawk a. Kan vaiin a Inah Mizo in mikhual ang thlapin min lo mi khual a. Kan cham laiin ni khat chu India rama Children Home pakhat Simultala, Bihar a mi tana suam tuakna Coffee Morning a siam a. Kan theih ang angin kan puia, mi za lai an lo kalkhawm a, Pound 1500/- lai a hmu chhuak a ni. A target aia tam a hmu chhuak a, a lawm hle. Heng sumte hi a hmuna kalin amah ngeiin a hlan thin.
A hnuaia thlalak hi a kawt lam pang atanga a In thla a ni a, sawi tawh angin a kawt lam hi chu Market a ni a. In a nei tha a, Ama luah bakah a inte hi Mi pathum laiin an la luah a ni. A in chu Sapho in changkang taka thil an tih ang hian a ti ve lova, a Missionary In hle a, Chaw einaah pawh serviet in chhawp thlip thlepte a awm ve lo. Lehkhabu hlui khawnkhawmna a siam a, chung chu a hralh leh a, chung atanga a hmuh chhuah zawng zawng pawh chu Missionary-a a thawh tawhna ram lamah a pe vek zel a ni.

Pi Joan William-i chuan Sapram hmun mawi hmingthang Cornwall lamah min chhuahpui a, Tuifinriat kam khua Looe an tihah min va hruaia, Tuifinriat kam vela tlang ram tlang panga Zoram ang maia an insakhote chu mawi kan tiin kan lung an tileng hle a ni.

A hnuaia mi hi Haytor an ti a, Lung tlang a ni ber ang chu. A chhipa ka han lawn chhuk thla leh lam thla a ni. A chhip atang hian a chheh vel ram zau tak lang rai dup maite chu thla lak tumin video camera nen ka lawn chhova. Thli a lo thaw nasa em em mai a, a chhip lungpui zawlah chuan din chu sawi loh thut ngam pawh a lo ni lova, ka bawk phek tawp mai a. Chuta tanga ka chhuk chu thawh kan ngam ni tawh hek lo, zangthalin a tawlhin ka tawlh liama. Ka kekawr hnung ipte kawrkilh te pawh ka ti keh a, a pawngte pawh a tet hial a ni. Amaherawhchu zahpuiawm khawpa tet erawh a ni lo hlauh.

Mi tamtak chuan Missionarya an thawhna ramte dik lohna leh sualnate hi an hre reng thin a, chu chuan an hmangaihna leh an duhsakna te pawh a tihkiamsak thin. Pi Joan William-i erawh chu chutiang a ni ve lo. India rama thil dik lo leh sualnate chu a hre hlei hlei a ni a, mahse chung chuan a hmangaihna a tikiam chuang lova, a tizual zawk emaw tih tur a ni. Tunah pawh hian Zoram leh India ram hmun thenkhatte tlawh turin a in buatsaih mek a. A thiannu pakhat amah zui tum chuan Aizawl Baby homeah thla engemaw zat tal a theih chuan puih ka duh a ti nghe nghe.

Pi Joan William-i India ram hmangaihtu hi dam reng rawh se.

LEGENDS OF GLASTONBURY

Great Britain-ah kum ruk lai kan lo awm ve ta bawk a. Kumin chu an ram mawia an sawi Devon leh Cornwall i tlawh ve teh ang kan ti a. Kan tlawh chak zualna chhan pa khat chu kan tunu hmingah Devon tih a nih vang a ni. Vanneih thlak takin Devonah hian Lt, Colonel Joan William India rama Missionary a awm tawh thin, India hmangaih em em mai chu a awm hlauh bawk a. A Inah Mizo in mikhual ang thlapin min lo mikhuala, a chungah kan lawm teh asin. (Chanchin kimchang Army Home lamah ka dah e). Kan thlenna khuaa chu Tavistock a ni a.

Tavistock-a an Biak In pakhat compoundah chuan Thing phun pakhat an lo nei a, chu chu kan thla lakpui hi a ni. He thing hi 'Glastonbury thorn' an tih zar sahthlak a ni tiin kan Guide chuan min hrilh.

Glastonbury Thorn: Sapho thu in hlan chhawn in a sawi dan chuan Isua thih hnu khan a ruang la thlaa phumtu Josepha Arimathai khua a mi kha Glatonbury-ah hian a lo kal a. Kohhran a rawn din a, chu chu Saprama Christian Kohhran ding hmasaber a ni nghe nghe. A Kohhran din Biak In compound-ah chuan a tiang a sawhphun a, chu chu a lo chawr a. Christmas ni apiangin a par a. A par chu vawiin thleng hian England lal In (Buckingham Palace-ah) an la thawn ziah a ni. Chu thing danglam leh chanchin nei tak mai chu a hnuaia mi hi a ni.
Hemi hmunah hian Christian-ten kut ropui tak an hmang thin. An sawi dan chuan Josepha Arimathai kha mi hausa tak a ni a, Isua nen inlaichinna an nei a. Glastonbury-a a kal hian Isua Nu Mari pawh a hruai a ni an ti.

ENGIN NGE HLA MIN PHUAH TIR

Salvation Army Officer training session 'Light Bringer' chu October 1970-ah tan a ni a. Kei chu a tir atanga pawm ka ni ve lova. Kal thei lo pakhat, Baktawng a mi ni ta awmin ka hria, a awm azarah kan hotuten min rawn ko ve leh hnuhnawh a. December thlaah Christmas dawn tep hian ka lut ve ta a. Cadet Kiamlova, ka ni ve ta.
1970 Octoberah min Commissioned a. Ka Corps hmasaber chu Tlangmawi a ni a, khaw lian lo tak a ni a. A khua pawhin In 14 chauh kan ni a. Primary School leh Middle School a awm a. A khua chu tlang chung zawla awm nuam em em mai hi a ni a. Amaherawhchu kan luahlum zawh loh em avangin khawchhung hnimbuk karahte hian Phivawkte an rawn riak ve thin a. Sai a rawn luh thuak thuak changte a awm bawk a. A khuain Sipai pawl vek kan ni a, chutih laia an lal chuan kohhran dang din a phal lova, Sipai pawl khua a ni tawp mai a ni. Kan mite chu ei leh barah an harsa em em mai a, mahse kan awm chhungin Pathian ram an neih ang atangin an pe tha a, Cachar District chhunga thawhlawm nei thaber kan nih changte a awm ve a. Chutih lai chuan thla khatah Rs 60 ka hlawh a, tanpui ngai zualte theih ang angin ka la pui ve leh chhawng thin a. Pathian zarah ka nghei bik lo.
Khawhar em em mai chang hi ka nei thin a, Kan khua atanga hmar thlang lam pangah chuan Ngaihban tlang ngaw dur tha em em mai hi a awma. Tlai ni tla turin chung tlang vel an chhun en ruih maite chuan ka lung a tileng zual thin a. Ka tap ru deuh thin a niber e. Kan bul hnaiah Officer dang han biak phak tur an awm mai si lova. Lothazawlah Lieutenant Thanhlira a awm ve a, mahse reiloteah Zoram lamah an sawn chho va. A Corps pawh chu ka va bial tel ve ta nghe nghe a. Pathian tanpuinaa ka tuar chhuak thei kha ka va lawm em!! Ka lungleng khawhar chu a ni taber ang chu hla min phuahtirtu kha; He ti hian ka'n ti ve ta a nih kha:

1. Aw awmkhua a har tinkim ka dawnin,
Nun hlui puan ang a chul tawh hnu kha;
Ngai mah ila kir an rel lo,

Zaitin ka chhiar nilen e.

Aw min awmpui la ka Lal nunnem,
Hmuh ka nuam i ram mawi chullo lawmna parmawi,
Vulna hmun min thlirtir rawh.

2. Thal favang tlai ni tla eng riaian,
Mahten awmhar tuar ka zuam lo e,
Leng la Lalpa ka thinlung ah,
Awmhar tuar a nem tawh ang.

3. Tlang tin ka chuan vel nun hlui ka thlir a,
Siangah an lawi siamtu runah chuan;
Mahriakten ar ang ka vai e,
Tinkim ka dawn chang ni hian.

4. Ka ngai ka pa ram lungduh an lenna,
Tahchuan awmhar tuar a awm tawh lawng;
Min tlantu beramno fakin,
Lungduh zawng an kim tawh ang.

Vanneihthlak takin Traininga kan awm laiin Naupang khawmpui Ruallungah kan tel ve a. Chuta tang chuan ka kumtluang kawppui tur ka chhar ta. Kan dawta Officer training session an hawn chu engemaw chen an kal leh tawh a; Kan hotute khawngaihna azarah engemaw chen session a kal hnuah, keimah ang bawkin, kan hotuten Nl Lalhlimpuii chu Cadet nih an phal ve leh ta a. Hun laklawhah training chu a zawm ve leh ta a. 1973 April thlaah chuan hotuten ka khawhar min hriatthiampui a ni ang, amahin an commissioned a, min rawn zawm ve ta a. Khawhar a hnem teh asin!!!!.